Nour Eldinالفترة الأخيرة قررت انقل لشقة جديدة فاضية وافرشها، بأقل تكلفة ممكنة وبأقل مجهود ممكن. وخليني هنا قبل ما احكي عن تجربتي اقول كلمتين مهمين لازم تقراهم عشان تقدر تحدد مدى استفادتك من اللي مكتوب بعد كده.
كل شخص، ليه حسابات مختلفة في معنى كلمة “تكلفة” وبالنسبة لي، التكلفة كانت مش بس رقم الفلوس، لأ كانت سهولة الحصول على المنتج من غير فرهضة كتير، ومن غير ما اضطر انزل مشاوير كتير او اماكن زحمة او الف كتير -عشان بزهق، وعشان مكنتش عاوز تجمعات عشان الكورونا كمان- ففيه بعض الحاجات اخترت اعملها ممكن يكون فيه بدايل ارخص ليها في الحقيقة، لكن تركيبة السعر+ الطاقة والوقت بتاعت اختياري على بعضها اقل.
تاني نقطة، بعض الحاجات اخترت ادفع فيها رقم ممكن يكون كبير واستثمر في حاجة غالية شوية لان تقديري ان قيمتها تسوى اكتر من الفلوس عشان حاجة استخدامها بالنسبة لي يومي ودائم، او عشان مستوى التحسن اللي هتضيفه لحياتي يستاهل ادفع رقم كبير، زي المرتبة مثلا وزي التلفزيون و زي الكنبة بتاعت الصالة اللي هقضي عليهم اغلب وقتي في الشقة. في الحاجات دي دفعت كتير بمزاجي، فهقول لكم جبت ايه وبكام وليه، وفنفس الوقت هقول لكم برضه على بدايل ارخص لو انت مش حابب تعمل نفس اللي انا عملته.
الدليل ده هيبقى متقسم لأجزاء عشان ميبقاش طويل اوي، أول جزء هتكلم فيه عن:
1- وسايل التمويل اللي ممكن تخلي الشرا سهل عليك وميزنقش جامد ماديا
2- ازاي خططت لهجيب ايه في البيت على كذا مرحلة عشان متزنقش
3- الأجهزة الكهربائية
وسايل التمويل اللي ممكن تخلي الشرا سهل عليك وميزنقش جامد ماديا
قبل ما نخش في عملية الشرا نفسها، نخطط هندفع ازاي الأول. بدأت اقلب كده واشوف الحلول المتاحة ليا لو مش عايز ادفع رقم كبير مرة واحده وحابب مثلا اقسط حاجات ممكن أعمل ايه، ولقيت كذا حل لطيف، استخدمت بعضهم احب اشاركهم معاكم:
| ValU | -CIB credit card وده شغال مع كريدت كاردز تانية برضه | |
|---|---|---|
| ايه ده | شركة مصرية بتملى الابليكيشن بتاعهم من البرنامج وتروح لاي فرع ليهم (قصاد اي كارفور وفوري بلس)، هتملا استمارة وتعمل شوية اجراءات وانت واقف، بيديلك على الابليكيشن رصيد معين، كأنها كريدت كارت ببلاش تقدر تستخدمها في الشراء من اماكن كتير جدا، وبعد كده تقسط انت الفلوس معاهم على المدة اللي انت عايزها مقابل فايدة (أحيانا). | كريدت كارد CIB بالذات عندهم ديلز تقسيط بدون فوايد على 6 شهور مع طوب الارض، خاصة سوق. بس CIB مش البنك الوحيد اللي عامل كده، اغلب البنوك دلوقتي عندهم اوبشن التقسيط مع اماكن كتير، واغلب الكريدت كاردز حاليا بتسمح لك بعد ما تعمل المعاملة تتصل بيهم وتطلب تقسيطها على مدة معينة اتصل بالبنك بتاعك دلوقتي وافهم منهم. |
| المميزات | 1- عملية التسجيل سهلة جدا ومبتاخدش وقت خالص 2- طريقة التسديد سهلة كاش او كريدت او فوري 3- المنافذ كتير فعلا اللي تقدر تشتري منها 4- ودي اهمهم، فيه اماكن كتير عندهم ديلز معاها انك تقسط 6 شهور بدون فوايد زي ايكيا مثلا 5- شغال مع اونلاين ستورز كتير زي سوق وجوميا | 1- عادة بيسمحلك تقسط اي معاملة انت عايزها، فمش فارق بقى انت شاري ايه منين 2- بعض البنوك زي CIB عندها اتفاقات مع بعض الاماكن انه فيه قدر من التقسيط ممكن على 6 شهور بدون فوايد افتح سايت بنكك واعرف نظامه |
| العيوب | 1- كل ما المدة تطول ساعات الفوايد بتبقى كتير شوية 2-مش مناسبة لو مش هتجيب من منفذ تبعهم، يعني لو محل عاجبك ومفيش ديل معاهم ملوش لازمة 3- لما تدفع القسط بكريدت كارد بتدفع 50 جنيه تقريبا مصاريف ادارية ، بس لو كاش عادي مفيش 4- ممكن حسب ورقك في النهاية يديك رقم هزيل مينفعكش اوي 5- بتمضي كمبيالة على المبلغ كله لما بتاخده على الآب، دي مفيهاش مشكلة بس بعض الناس ممكن تقلق من ده | 1- ساعات بيبقى النسبة عالتقسيط كبيرة شوية لو مفيش ديل مع المنفذ 2- معرفش دي كل البنوك ولا لأ، بس CIB بيخصم القيمة الكلية من سقف الكارت بتاعي وبالتالي بيفضل قليل لحد ما ادفع، مثال: الكارت بتاعي سقفه 10 الاف جنيه، انا اشتريت حاجة وقسطت المعاملة وسعرها 6 آلاف على 6 شهور كل شهر ألف. الحد الائتماني بتاعي هيبقى 4 آلاف ويزيد الف شهري لحد ما يرجع 10 تاني بعد ال6 شهور، ده ممكن يبقى مزعج. |
طرق تانية؟
فيه طرق تانية بس انا شخصيا مجربتهاش فهتكلم عنها باختصار:
1- بسهولة، و “شهري“: دول برامج تقسيط زي فاليو المفروض، بس انا مجربتهمش
2-موني فيلوز: ودي شركة مصرية بتسمحلك تعمل جمعيات عن طريقهم، فدي ممكن تبقى وسيلة لطيفة للتمويل، بس برضه انا شخصيا مجربتهمش
3-بعض المنافذ عندها هي نفسها برامج تقسيط
نصيحة عامة: اي مكان ناوي تشتري منه او بتفكر تشتري منه، شوف عالسايت بتاعهم او كلمهم اسألهم عن طرق الدفع المتاحة. اغلب اماكن العفش والاجهزة دلوقتي بقى عندها طرق تسهيلات كتيرة دلوقتي ممكن يبقى منها حاجات انا نفسي لسه معرفتهاش.
ازاي خططت لهجيب ايه في البيت على كذا مرحلة عشان متزنقش
قبل ما اشتري، قررت اقسم احتياجات العفش ل3 مراحل عشان الدنيا تبقى سهلة:
| الاساسيات | الفرعيات المهمة | الفرعيات اللي عايزها |
|---|---|---|
| اللي معرفش اقعد في الشقة من غيرها | حاجات محتاجها ومهمة بس ممكن اعيش حبة من غيرها لو اضطريت | حاجات مهمة بالنسبة لي وتبسطني وعايزها في بيتي، بس مش مستعجلة، لو معيش فلوس دلوقتي ممكن استنى عليها شوية |
| الكنبة، المرتبة التلفزيون، التلاجة، المايكروويف وشوية رفايع زي كام لمبة ترابيزتين تلاتة من فراج، دولاب مؤقت | البوتاجاز، السرير، طرابيزات الصالة، خشب المطبخ، حاجة الحمام، دولاب، حامل تلفزيون | سجاجيد، مروحة، اجهزة مطبخ (خلاط، رايس كوكر وكام حاجة تانية)، لوح اعلقها، فرش البلكونة، زرع، مكتب شغل و اي حاجة تانية بقى. |
| مرحلة 1 | مرحلة 2 | مرحلة 3 |
3- الأجهزة الكهربائية
نخش التقيل بقى؟ الاجهزة الكهربائية، وهنتكلم عن الاجهزة الاساسية: تلاجة، غسالة، بوتاجاز، مايكروويف
ملحوظة: ال جي وسامسونج في النهاية هم أعلى براندات في كل الأجهزة تقريبا، فانا مش هجيب سيرتهم لاننا هنا بنتكلم عن اكتر حاجات سعرها معقول مقابل جودة وكفاءة مقبولة.
معايير الاختيار في الاجهزة بشكل عام:
- الحجم او المساحة هتكون دايما قريبة من احتياجاتي، مش اكبر بكتير
- يهمني في البراند اكتر حاجة الاعتمادية، وانه يكون عنده توكيل كويس، في براندات كويسة بس جالي فيدباك سئ عن توكيلها فمش هجيب سيرتها
- الاستخدام: اد ايه الجهاز ده هيستخدم كتير وبالتالي يستاهل اطلع لاعلى ليفل ولا لأ؟ مثلا انا كشخص عايش لوحدي الغسالة دي هستخدمها مرة ولا اتنين بالكتير في الاسبوع، فافشخ غسالة في العالم مش حاجة مهمة، عكس لو اسره 4 افراد مثلا كفاءة الغسالة تفرق.
اشتري الاجهزة منين؟
بما ان دي حاجة منطبقة على كل الاجهزة، هبدأ بيها، انا عملت ايه لما جيت اشتري؟
- بعد ما عملت سيرش اونلاين طبقا للمعايير اللي حددتها، نزلت كارفور وصورت بموبايلي كل اختياراتي باسعارها عشان استخدمها كاساس اقارن بيه
- عملت سيرش على كل مواقع الاجهزة اونلاين على كل جهاز من دول (بما فيهم كارفور نفسه اونلاين) عشان اوصل لاحسن سعر، واغلب الوقت لقيت السعر اونلاين احسن
- لو عرفت اشتري كذا جهاز من نفس المكان بيبقى الطف عشان بيكون ساعات فيه اوفرات على التوصيل
طيب ايه المواقع بقى اللي ابص عليها اونلاين على الاسعار ولقيت عليها عامة احسن اسعار؟
| Yaoota, Pricena | موقع بيقارن بين الاسعار في المواقع المختلفة للاجهزة، بحب ابدأ بيه |
| القاهرة للمبيعات | الحقيقة اتفاجئت انه عادة بلاقي عليه ارخص اسعار! |
| سوق وجوميا ونون | مش محتاج أتكلم عنهم كتير |
| AmanStores | بتسمح لك بالتقسيط علطول |
| CairoCart | أوفات كتيرة بيبقى عنده اوفرز لذيذة |
| Carrefour | الويب سايت جميل بس أنا بحب أروح فرق المعادي |
تشتري امتى؟
سؤال بقى مهم جدا جدا جدا، فيه أوقات معينة كده تقدر تخطف فيها أسعار هايلة للأجهزة الكهربائية:
- عيد ميلاد كارفور في يناير (لقطت فيه بقية الاجهزة كلها تقريبا)
- البلاك فرايداي على سوق وجوميا ونون وكل حتة في نوفمبر (لقطت فيه المايكروويف والتلفزيون)
- عيد ميلاد جوميا في يونيو
- عيد ميلاد سوق في ديسمبر
طيب الاسعار دي مازالت غالية وعايز حاجة ارخص؟ خش يا معلم عالفرز التاني
يعني ايه فرز تاني؟
بتبقى الاجهزة اللي فيها عيوب سطحية في الجسم من بره او تجاريح وكدمات لكن مكوناتها الداخلية سليمة. بس عيبها الرئيسي انه ملهاش ضمان، فهي ارخص، فمحتاج تركز فشخ
طب تجيبها منين؟
دي شوية صفحات على فيسبوك بتبيع واتقال لي عليها من ناس اعرفها شخصيا اشترت منهم:
مؤسسة الرياض للأجهزة الكهربائية وفرز انتاج
همسك واحدة واحده كده نتكلم على المهم حسب ما فهمت ونختار ازاي وفين وبكام:
التلاجة:
- الحجم: ده سؤال مهم جدا، عندك حاجتين على اساسهم تحدد حجم التلاجة اللي انت محتاجها:
- المساحة: لو عندك مساحة معينة في المطبخ لازم تبقى قايسها وعارف تقدر تجيب تلاجة ابعادها ايه
- عدد الافراد: القاعدة بتقول 4-6 قدم للشخص، فلو انتوا شخصين فانت محتاج تقريبا 12 قدم بالتقريب. قول 14 عشان تبقى واسعة شوية. بس دلوقتي اغلب التلاجات بتتقاس باللتر، فتقدر تحسب التحويلة على جوجل، 12-14 قدم تقريبا يعني 340-395 لتر
- الماركة: دورت كتير وسألت على البراندات وتجارب الناس، واقدر اقول لكم باختصار ان الطف براندات وانسبها كأسعار:
- توشيبا و شارب: توكيل العربي عامة لطيف جدا وكل الفيدباك اللي جالي عن خدمة ما بعد البيع هايل، وشارب بالذات شكلها حلو كمان
- بيكو: ماركة تركي أثبتت كفاءة الفترة اللي فاتت، وارخص شوية من توشيبا وشارب، لو عايز اقل تقدر تنزل من توشيبا وشارب لبيكو
السمات المهمة:
- تكون نو فروست
- يكون فيها inverter technology: الانفرتر باختصار تقنية بتسمح لموتور الجهاز يدور على سرعات مختلفة حسب الحاجة، فده بيأدي لتوفير كبير في الكهربا، عشان كده ينصح ان الاجهزة اللي استهلاكها في الكهربا كثيف او شغالة 24 ساعة تجيبها فيها انفرتر.
البوتاجاز:
فيه براندات كتيرة لكن الحقيقة لقيت ان زانوسي ولا جيرمانيا لطاف، وفيه برضه يونيون اير الicook بس ده لو انت هتبطخ كتير ممكن يبقى مفيد
لكن كشخص يعني اه بيطبخ بس مش نشاط يومي اساسي فكنت عايز براند متوسط وبوتاجاز صغير
فاخترت بوتاجاز 4 شعلة، زانوسي، حوامل زهر لطيف جدا.
الغسالة
الغسالات مليئة بالاوبشنز، هتحتاج تحدد:
- حجم الغسالة، طبعا على حسب انتوا كام شخص وهتغسل كام مرة في الاسبوع
- الافيريج لشخص او 2 بيغسل مرتين في الاسبوع مثلا 6-7 كيلو لطيف اوي
- نوع الغسالة: فيه نوعين تحميل امامي ومن فوق
- تحميل امامي: مميزاتها انها بتغسل احسن، جواها سخان فمش محتاجة تتوصل بمياة سخنة، وفيه منها احجام اصغر، تقدر تستخدم سطحها كقاعدة تحط عليها حاجات وده مفيد في المساحات الصغيرة. عيبها ان لازم تستخدم مسحوق الاوتوماتيك فقط (اغلى من المساحيق العادية شوية)، وعادة سعرها في الاحجام الكبيرة اغلى بفرق عن التحميل من فوق
- تحميل من فوق: ميزتها طبعا انها مريحة للضهر انت بترمي من فوق، عادة مش هتلاقي اقل من 12 كيلو فمفيدة للعائلات، بتاخد اي مسحوق وسعرها عادة ارخص. عيوبها انها مفيهاش سخان فلازم تعمل وصلة توصلها بالسخان مخصوص مش منها فيها، ومينفعش تحط عليها حاجة من فوق فمش لذيذه في المساحات الضيقة. بيتقال مبتنضفش كويس بس مش حقيقي اهلي بيستخدموها من زمان زي الفل
- البراندات:
- كالعادة زانوسي براند متوسط لطيف، لكن فيه برضه وايت بوينت لكن زانوسي بشكل عام في تقديري براند all round متوسط وكفاءته كويسة.
الميكروويف:
بالنسبة لي لا غنى عنه، لو بالنسبة لك مش اساسي عديها
تبص على ايه وانت تبتشري ميكروويف؟
- الحجم: بص من 25 ل30 لتر زي الفل مهما كان عددكم
- مميزات مهمة: نصيحتي هات دايما مايكروويف فيه جريل، هيساعدك تطبخ حاحاجت كتير بسهولة وهيزولدك اوبشنات استخدامه
- البراند: الميكروويف من الحاجات اللي هتستخدمها كتير فانك تستنضف جامد في النوع شئ مهم، احسن براندات ميكروويف هم LG و Kenwood
التلفزيون
التلفزيون بقى قصة كبيرة فانا مش هتكلم في كل تفاصيله عشان فعلا موضوع تفضيلات شخصية اوي، بس نصيحتي؟
استثمر فشخ في التلفزيون، ومفيش حجم هتندم عليها غير انك مجبتش الاكبر. احنا في عصر اغلب الentertainment بتاعك خلاص هيبقى على تلفزيونك، يا نتفلكس يا فلاشة يا ماتش يا بلاي ستيشن
انا جبت تلفزيون 55 بوصة وندمان اني مجبتش اكبر!
التلفزيون مفيهوش هرس كتير، يا LG يا سامسونج ودي تفضيلات، وطبعا تجيبه سمارت. الباقي بقى ممكن اتكلم فيه وقت تاني عشان التلفزيون بالذات قصة كبيرة وتفاصيلها كتير. بس بجد متستخسرش في التلفزيون
طب لو عايز حل ارخص؟
فيه Setup تاني ممكن تعمله لو عاوز حل أرخص، ممكن تجيب تلفزيون عادي مش سمارت وتجيب معاه streaming device يحولهولك لAndroid TV، ودي اجهزة ظهرت بتسمح لك تحول اي تلفزيون عادي لسمارت المهم بس يكون فيها USB
فممكن مثلا تجيب تلفزيون 40-43 بوصة من ماركة نضيفه في حدود 5000 جنيه مش سمارت وتجيب معاه حاجة من ال3 دول:
Mi TV Stick او Mi Box S أو Chromecast
وعلى بعض الليلة كلها مش هتكمل 6-7 آلاف لو عاوز.
وسهل تتحكم في التكلفة طبعا بحجم الشاشة عادي، ال3 أجهزة بتوع الAndroid TV سعر الواحد بيتراوح من 1000 ل2000، طبعا انهي احسن ليك دي قصة تانية مش مكانها هنا
طيب كده خلصت الجزء ده، وده هنا جدول فيه ملخص كل اللي انا اخترت اشتريه ليا وسعره وجبته منين:
| الجهاز | الموديل | منين | السعر |
|---|---|---|---|
| التلاجة | توشيبا انفرتر نوفروست سعة 359 لتر ، 2 باب لون استانلس GR-EF46Z-DS “ | elarabygroup | 7,200 |
| الغسالة | Zanussi 6KG front loading family care | carrefour | 4,444 |
| البوتاجاز | زانوسي، 4 شعلة، free standing حوامل زهر | carrefour | 4,354 |
| المايكروويف | كينوود 30 لتر بالشواية MWL311 | cairosales | 3,100 |
| التلفزيون | LG تلفزيون ذكي بدقة 4K مقاس 55 بوصة مع جهاز استقبال مدمج وجهاز تحكم عن بُعد ماجيك 55UM7340PVA أسود | noon | 8,400 |
| المجموع | 19,098 |
[…] في الجزء الأول اتكلمت عن وسايل سهلة للتمويل، وازاي جبت … […]
لاجيرمانيا ” LA Germania ”
NOT
جيرمانيا
بنصرف كتير علي الاسم و الله ?
لامؤاخذه 😀
عدلتها
[…] في الجزء الأول اتكلمت عن وسايل سهلة للتمويل، وازاي جبت الاجهزة الكهربائية اللي محتاجها بأقل تكلفة، تقدر تقرا الجزء الأول من هنا. […]