Nour Eldinالفترة الأخيرة قررت انقل لشقة جديدة فاضية وافرشها، بأقل تكلفة ممكنة وبأقل مجهود ممكن.
هتكلم عن بقية الاساسيات، ازاي فرشت الصالة، واشتريت مطبخ وعملت كوفي كورنر لطيف بتكلفة قليلة…
ازاي فرشت الصالة؟
كنت مقرر من الأول ان الصالة عندي = الliving = الصالون هي كل حاجة مش محتاج يبقى عندي كذا واحده يعني.
ورأيي اجمل واسهل اختيار ممكن لفرش الصالة بسلاسة هو الL-shape وممكن جنبها بوف او 2-3 بين باجز وشكرا على كده
طب ايه غير ال L-shape؟
قررت اني عايز4 طرابيزات:
- طرابيزه صالة coffee table
- طرابيزة تلفزيون TV table
- طرابيزه أكل dining
- و طرابيزه جنب صغيرة side table
قبل ما اخش في التفاصيل هقول لكم Teaser صغير: الحاجات دي كلها على بعض ممكن تجيبها حلووة جدا ونضيفة جدا بتوتال ميزيدش عن 10 آلاف جنيه.
منين اشتريت الL-shape ومنين تجيب عامة كنب او فرش صالة او living room
لو خدنا في اعتبارنا زي ما قلت لكم انا البساطة والتكلفة عندي جزء منها ليه علاقة بالمجهود، فانا هقول لكم اسهل\ارخص حل في رأيي:
عندك 4 أماكن ممتازة للحاجات دي ذوقا وتكلفة:
| ايه اللي عجبني عندهم؟ | ||
|---|---|---|
| Hub furniture | الحقيقة عنده اوسع تشكيلة وفروع، وحلول كتير للتقسيط السهل مع فاليو وبنوك كتير لحد سنة بدون فوايد | الكنب والLshape بيبدأ من 7 وده سعر كويس جدا، وعندهم lazy boys جميلة ب خطط اشتري واحد قريب حاجتهم نضيفة واسعارهم مش رخيصة بس مش غالية عالكواليتي وعندهم اذواق كتير، مكان عامة هايل انك تبدأ بالتدوير فيه |
| Designy | ديزايني هو براند المفروض انه الارخص لشغل مصمم الاثاث المشهور عمرو حلمي، فخليط هايل من الكواليتي والذوق كان عندهم فرع في مدينة نصر وكان بيعمل تصفية عشان بينقلوا التجمع لقطت منه كام حاجة فشيخة | هو ديزايني حاجته مش رخيصة خالص ، بس طول الوقت فيه اوفرز، فالحاجات اللي عليها اوفر اغلب الوقت بتبقى سعرها حلو وكواليتي فشيخة ، لقطت الصالة بتاعتي من هناك. |
| قباني للأثاث | مشهورين وفي كل مكان، شغل متوسط ولطيف، اسعار معقولة جدا، بس اذواق بيزيك اوي، وتسهيلات سداد مع فاليو وبنوك مختلفة وتوصيل وتركيب سريع ونضيف | ممتاز للبيزيكس، عايز طرابيزات عادية، كنبة مفيهاش حوار، اي حاجة شكلها عادي اساسي هتلاقيها بسعر معقول، لما نيجي للاوضة هجيب سيرته تاني. |
| Homzmart | عنده تشكيلة واسعة جدا جدا جدا واسعار ممتازة وتقدر تقسط معاهم عن طريق فاليو | تقدر تجيب Lshape من اول 5 الاف جنيه، بس الحقيقة انا مشتريتش منهم حاجة ومجربتهمش وبسمع فيد باك سئ عن خدمة العملاء بتاعتهم فخفت الصراحه، بس مؤخرا سمعت من بعض الاصدقاء فيدباك كويس فبفكر اجربهم |
انا جبت ايه؟
لما رحت ديزايني، طمعت الحقيقة واشتريت U-shape عرضها 4 متر كان عليها اوفر عندهم:
سعرها بعد الخصم كان 14 ألف، وخدتها وانا عامل حسابي اني هاخد حرف L في الصالة، والجزء اللي فاضل هحطه في اوضة فاضية كنبة\سرير للضيوف.
بس رأيي انك ممكن جدا تجيب L مقاسها كبير وكويسة بسعر أقل لو مش محتاج كل ده، في حدود 7-10.
فيه مكان كمان هايل بس هو الحاجات اللي حلوة وسعرها حلو بتبقى لقط، Smart furniture، عامة حاجته جميلة جدا وذوقها حلو وفيه حاجات مشفتهاش غير عنده بس بشكل عام غالي سيكا، بس اوقات ممكن تلقط حاجات سعرها حلو، عندهم Lshape ب10 اسمها dream مثلا جميلة جدا.
ال4 طرابيزات بقى منين؟
الحقيقة حطيتهم لوحدهم عشان دول من تاني اكتر صفقة فخور بشراها كvalue for money
طرابيزه صالة+ طرابيزة سفرة+ طرابيزة جنب صغيرة+ طرابيزه تلفزيون = 3000 من ايكيا + توصيل وتركيب ببلاش!
ازاي؟
اغلب الناس انطباعها عن ايكيا ان حاجته غالية، وده مش غلط اوي، بس ايكيا برضه لو دورت كويس عندهم حاجات شكلها حلو ومودرن وبيزك باسعار عظيمة جدا، وعندهم كمان organization tools حلوة جدا جدا.
بالنسبة للطرابيزات عندهم لاين اسمه LACK اغلب حاجته بيزيك ورخيصة جدا، جبت منه طرابيزه الجنب والتلفزيون و الcoffeetable
ولقيت dining table لطيفة جدا اسمها tärendö
معلومة طريفة: لقيت اني اغلب الوقت باكل في الصالة او عالcoffeetable، فخدت الطرابيزه دي في الجنب وخليتها كوفي كورنر، وبعدين بعد شوية لقيت اني محتاج مكتب، فجبت طرابيزه قلاب من فراج ب300 جنيه 60*100 وخليتها الكوفي كورنر وخدت الطرابيزه دي بقت مكتبي وهايلة جدا ومقاسها مناسب جدا واكبر كمان من الLINNMON/ADILS اللي هو اشهر مكتب رخيص ولطيف بيتباع في ايكيا واغلى منه ب200 جنيه بس.
دي لينكاتهم:
طرابيزة القهوة – طرابيزة السفرة – طرابيزة الجنب – طرابيزة التلفزيون
بونص: ايكيا لما بتشتري وتدفع بValU، بتقسط 6 شهور ببلاش وكمان بيبقى التوصيل والتركيب ببلاش، فاستغليت الفرصة بصراحه بدل ما اقعد اركب في 4 طرابيزات.
اقرا اكتر: إزاي تعمل مكتب مريح في البيت بتكلفة معقولة
المطبخ
فاكرين اني قلت الطرابيزات تاني احسن صفقة عملتها؟ وده عشان المطبخ هو احسن صفقة عملتها الحقيقة، ده المطبخ بتاعي:
بكام؟
3000 ج بالتوصيل والتركيب، عبارة عن قطعتين عرضهم 160 سم، فوق وتحت + رخامة.
من فين؟
*
*
*
*
*
*
*
*
ايون، زي ما قريت كده 😀 عندهم مطابخ جاهزة وكواليتي كويسة عادي وشكلها لذيذ زي ما انت شايف وتم بحمد الله تكلفة مطبخ كامل بتركيبه وتوصيل بمفيش 😀
وبكده نكون خلصنا تاني جزء، فاضل جزء تالت وأخير، لو عندكم اسئلة او اقتراحات قولولي في التعليقات عشان احطها في حسابي في الجزء التالت…
التكيفاااات يااا ? شغل عالمي من أيام بلوجات السفر
مساء الخير
شكرا علي الجزئين الاولانيين 🙂
ممكن في الجزء التالت تتكلم علي اماكن بيع المفروشات؟ واختيار المرتبة؟ وادوات المطبخ؟(الاطباق والحاجات دي مثلا)؟
ولو فيه فرصة كمان لو حد محتاج مساعدة مهندس ديكور بسيطة ممكن يوصل لحد ازاي بطريقة بسيطة؟
فيه مكان تانى بيعمل مطابخ بنفس رينج الاسعار؟
بصراحه مدورتش، انا لمحت ده قمت دايس
بس اظن مكان زي Designy لو لحقته في وقت السيلز ممكن يبقى فيه