ليه الدايت المبني على تقليل السعرات فقط بدون النظر لأي عوامل تانية هيفشل دايما؟

النهارده عايز اكمل معاكم تكسير اسطورة النظرة القاصرة لفقدان الوزن في الجسم انه مجرد Calorie deficit

او يعني فرق كالوريز وانك مجرد ما تاكل كالوريز اقل هتخس وتبقى زي القمر

انت جسمك بيحرق مثلا 2000 سعر في اليوم، وانت قررت عشان تخس هتاكل 1500 سعر بس في اليوم- 500 سعر فرق اهو، فيه احلى من كده؟

بس ال1500 كالوري دول اغلبهم كربوهيدرات، بس اهو مازال انت بتاكل كربوهيدرات اقل.

ايه اللي هيحصل في السيناريو ده؟

هتخس!

من بره هتشوف ان رقميا وزنك عالميزان بينزل، لكن تعالى ناخد بصة اعمق بقى ونشوف هيحصل ايه

جسمك محتاج 2000 كالوري زي ما قلنا، انت اكلت 500 اقل، فجسمك محتاج طاقة توازي ال500 اللي فاضلة دي، فهيعمل ايه؟

اكلك كاربوهيدرات كتير هيأدي لارتفاع الانسولين في دمك بشكل مستمر

وبالتالي انزيم HPL هيبقى مثبط، يعني مش هيشتغل كفاية، فجسمك مش هينجح في انه يوصل لمخازن الدهون اللي ففخادك للاسف

جسمك هيعمل كذا حاجة عشان ينظم الطاقة فجسمك ويسترجع التوازن:

1- هيخش في الاول على مخازن الكاربز اللي في كبدك وعضلاتك بس ده مش هيكفي لانهم قليلين

2- هيبدأ يرسل اشارة للمخ عشان يقولك انا جعان يا معلم دخل لي كربوهيدرات مش قادر محتاج طاقة

طب انت وحش وارادتك حديد ومش هتدخل له كاربز ومسيطر

العضلات هي اكتر اجزاء في الجسم بتستهلك طاقة فهيبدأ ياكل في عضلاتك، منها يعوض فرق الطاقة، ومنها يقلل بعد كده كمية الطاقة اللي جسمك محتاجها عشان يشتغل

يبدأ يقلل الطاقة اللي جسمك محتاجها عن طريق ارسال اشارات لجسمك انك مرهق وتعبان ومش قادر تتحرك

فتبدأ تتعب ومتبقاش قادر على اي مجهود حركي ولا عضلي

فيبدأ الحرق عندك يقل اصلا

وبالتالي ال500 كالوري دول اللي انت منقصهم بيبتدوا يبقوا مش كافيين لان جسمك قلل نسبة حرق جسمك وبقى متعود على 1500

فهتحتاج تنزل ل1000

وبالتالي، هتبص تلاقي وزنك نزل اه يا معلم، بس منزلش دهون، دهونك زي ما هي، اللي نزل من جسمك عضلات ومياة مش اكتر.

عشان كده الناس اللي وزنها زايد زي حالاتي وحالات بعض القراء بيتعب فشخ مع الدايت وبيبقى مش قادر يتحرك والناس بتتهمك بالكسل، لكن انت مش كسول، انت جسمك شغال ضدك

انت مش مفجوع، انت جسمك شغال ضدك ومخليك جعان

اسلوبك في الدايت المبني على سعرات كتير من الكاربز is doomed to fail، وصعب جدا انه ينجح الا بقى بطاقة وارادة استثنائية عشان كده قصص الخسسان العنيف اللي مش مبنية على اساس كبير هتلاقيها كلها محتاجة مجهود ابن لذينة، الموضوع مش ضروري يبقى بالشكل ده، بس عشان مش فاهمين بنعمل كده

الفكرة انك لما بتاكل دهون وانت الريدي انسولينك عالي عشان برضه بتاكل كاربز كتير، فالدهون دي هوب بتروح لفخادك علطول لكن مش بتتحرق

لكن لو انت مثلا في وضع ان الانسولين بتاعك واطي عشان انت واكل كاربز قليلة، مع الوقت جسمك هيتعود يحرق دهون فانت لما بتاكل دهون لو انت بتاكلها وانت في caloric deficit جسمك هيحرق دهون زي ما بيحرق كربوهيدرات فهيدأ خسسانك يبقى دهون كمان.

لا محدش قال كده، انت محتاج بس تعمل حسابك انك لو ناوي تعمل دايت خاصة لو شخص تخين زي حالاتي (شخص تخين يعني بنسبة لا بأس بيها عندك مقاومة انسولين ونمط اكلك معناها ان فيه انسولين كتير) يبقى لازم تعمل حسابك انك تعمل low carb diet، مش لازم كيتو، الكيتو نسخة اكستريم شوية، انا شخصيا شايفه حل لطيف بس مش ضروري لانه برضه ليه عيوبه ولو مانتاش حذر كفاية ممكن يعمل لك مشاكل صحية

1- اعمل دايت فيه كاربز قليلة

2- كل اكل فيه الياف عشان بتقلل الجوع وبتقلل تأثير الكاربز

3- لو قررت تعمل كيتو اشتغل مع دكتور تغذية هيبقى افضل

4- الرياضة مفيدة جدا، الرياضة مش هتخسسك، لكن ممارسة الرياضة بتدي جسمك اشارات انك محتاج عضلاتك، وبالتالي بتقلل احتمالية فقدان عضلات في الدايت، ولو عرفت كمان تبني عضلات ده بيساعدك تحرق اكتر بس مش بشكل كبير، بس ممارسة اي نشاط رياضي بيساعدك متخسش عضلات، ولو مجرد المشي شوية كل يومين

المعرفة هتساعدك – وبتساعدني دلوقتي- اجرب وافهم جسمي واعمل ايه عشان ابدأ اخسر وزن بشكل صحي وسليم، ادعولي وجود لاك لكل اللي بيحاول زي حالاتي