إيه هي مقاومة الانسولين وازاي بتأثر في الوزن؟ وليه الكاربوهيدرات هي العدو الحقيقي؟

حاجة من اهم الحاجات اللي محتاج الناس تفهمها عن زيادة الوزن والسمنة هي ان التعامل بمنطق فيزيائي بتاع Calories in – Calories out هو فكرة قاصرة مش هتسمحلك تفهم جسمك بيشتغل ازاي ولا ليه احنا بنتخن ووزننا بيزيد جامد وبنركب زحليقة الوزن.

ايه هي الكاربز (الكربوهيدرات) الCarbs؟

هو اي اكل بيحتوي على سكريات، الياف او نشا، زي ايه؟

كل الحلويات، العسل والمربى كل المخبوزات، كل منتجات الدقيق والنشا، الزيوت الصناعية وزيوت النباتات (زيت عباد الشمس الخ)، البطاطس، الرز والمكرونات والنودلز، الكورن فليكس ومنتجات الشوفان، اغلب المعلبات، بعض انواع الخضار زي الذرة والفول، والعيش طبعا، بعض المكسرات

بس فيه معلومة مهمة، الفايبرز او الالياف بتقلل تأثير الكربوهيدرات، فلو اكلة فيها كاربز وفيها الياف كتير ده بيقلل تأثير الكاربز

اعرفكم على “مقاومة الانسولين” Insulin resistance

ايه الانسولين وبيشتغل ازاي؟

لما بتاكل كاربزCarbs (كاربوهيدرات) السكر في دمك بيعلى (الجلوكوز)

فالبنكرياس بيفرز انسولين عشان ياخد الجلوكوز يدخله جوا الخلايا اللي فيها مستقبلات انسولين عشان يطلع طاقة (الميكانيزم الاول لتخليق الطاقة في الجسم)

جميل فين المشكلة؟

لما الانسان بيبدأ ياكل كمية كبيرة من الكربوهيدرات بالذات، خاصة ان جسمنا عكس ما انت متخيل مش محتاج كاربز كتير خالص عشان يشتغل كويس (باستثناء طبعا لو بتلعب رياضة عنيفة)، فالزيادة دي بتروح فين؟

جسمك بيبدأ يخزنها،

في الاول بيخزن حوالي 70 جرام في الكبد و حوالي 200 جرام في العضلات (عشان كده زيادة حجم العضلات مفيد لانه بيسمح بتخزين قدر اكبر من الكاربز (بيعلي الحرق))، طيب لما المخازن دي بتخلص بيعمل ايه؟

بتبدأ مستقبلات الانسولين دي خلاص متبقاش عارفة تشتغل ولا تحرق زيادة، بس لازم الجلوكوز يروح في حتة لان مستوى الجلوكوز العالي في الدم خطر وممكن يأدي لبلاوي (اللي بنسميها بقى مضاعفات السكر عند الناس اللي سكرها عالي بشكل مستمر)

فيبدأ جسمك يكسر الجلوكوز لtriglycerides ويخزنها في المكان الوحيد اللي اكتشوالي مستقبلات الانسولين بتزيد فيه،… الخلايا الدهنية .. اكا فخادك وكرشك

عشان نستخدم الطاقة اللي جوا الانسجة الدهنية fat tissues ، الاحماض الدهنية fatty acids لازم تطلع من الانسجة عشان تتكسر وتتحول لطاقة وده هيخليك “تفقد دهون” وتحولها لطاقة (الميكانيزم التاني لتخليق الطاقة في الجسم)

ايه بقى مقاومة الانسولين دي؟

لما بتستمر لفترة على اكل كاربوهيدرات كتير الخلايا الدهنية في جسمك بتفضل تكبر وتكبر عشان تخزن الجلوكوز الزيادة، فمع الوقت بتبدأ الخلايا نفسها تخلي دخول جلوكوز ليها صعب عن طريق زيادة كمية الانسولين اللي محتاجاها

يعني ايه الكلام ده؟

يعني لو مثلا كان جسمك بيحتاج جرام انسولين عشان يخزن السكر اللي في بسكوتة واحدة في الخلايا الدهنية، مع الوقت جسمك هيبدأ يبقى محتاج حوالي 10 جرام عشان يخزن نفس البسكوتة

ولما يبقى مستوى الانسولين عالي في جسمك (من كتر اكل الكاربز) مبتقدرش تشغل الآلية بتاعت تحويل الدهون لطاقة، لأن الانزيم المسؤول عن استخراج الاحماض الدهنية من الخلايا وتكسيرها HPL حساس للانسولين، وكل ما الانسولين يزيد الانزيم ده بيقل

فبالتالي ارتفاع الانسولين بيمنع الانزيم يشتغل وبالتالي بيمنع جسمك يستفيد من الطاقة اللي متخزنة في الدهون

فايه اللي بيحصل يا معلم؟

• جسمك محتاج طاقة
• جسمك مش قادر يستخدم الطاقة المتخزنة فيه
• فبيضطر يلجأ لوسيلة خارجية
• يبعت اشارة لمخك انه محتاج طاقة = “انا جعان”

تقوم مدخل كاربز زيادة، يقوم جسمك يحرق شوية طاقة بالانسولين ده بس بما ان جسمك بقى واخد على انه يفرز انسولين اكتر من اللي الجلوكوز اللي داخل جسمك محتاجه فالانسولين يفضل زيادة، تقوم الطاقة تخلص بسرعة فجسمك يحتاج طاقة ونعيد الدايرة دي من الاول وكل ده انت بتخزن دهون كمان!

ف:

1-تفضل تتخن عشان بتخزن دهون

2- كل ما تاكل كاربز بعدها بحبة صغيرين تجوع تاني فتاكل فتتخن

فالحقيقة انك مش بتتخن عشان بتاكل، انت بتاكل عشان بتتخن!

مش بس كده

مصنع الانسولين في جسمك -البنكرياس- مش مؤهل لانتاج كل هذا القدر من الانسولين في فترة قصيرة انت بترهقه، فمع الوقت يبدأ يتعب وبعدين يتوقف تماما وده المرض اللي بنسميه “السكر لنوع التاني”

اقرا اكتر: ايه الهرمونات المسؤولة عن الجوع والشبع في جسمنا وازاي ننظمها؟

ليه بقى ابتدت تبقى انظمة الlow-carb زي الكيتو منشترة اكتر؟ (مش لازم الكيتو بالذات فيه انظمة كتير low carb مش لازم توصل لمستوى الextreme بتاع الكيتو)

لأنه لما اكتشفنا الآلية دي بقى لقينا ان ده اسلوب كويس لعكسها

لما بتقلل اكل الكاربز بيبدأ يحصل الآتي:

1- افراز الانسولين في جسمك يبدأ يقل

2-هرمون HPL يبدأ يشتغل

3- فجسمك يبدأ يقدر تاني يحرق دهون متخزنة في جسمك مش بس جلوكوز لانه لما يحتاج طاقة دلوقتي مفيش انسولين مانعه من تشغيل هرمون تكسير الدهون

4-يبدأ انتاج الانسولين بعد فترة يتregulate تاني وتقدر تreverse الآلية الشيطانية بتاعت مقاومة الانسولين اللي هي اساسا متسببة في شعورك الدائم بالجوع وزيادة الوزن

5- تبدأ تبقى شبعان لفترات طويلة (اي حد جرب الكيتو عارف الشعور ده فشخ)

6-يبدأ جسمك يتعافى بل وفي بعض الاحيان الناس اللي كان عندها سكر النوع التاني بتبدأ فعليا تستغنى عن الادوية كمان

كيلو كاربز مش = كيلو بروتين ولا كيلو دهون

والموضوع اكبر واعقد من اختلال فيزيائي في ميزان الكالوريز

التخن وزيادة الوزن اختلال هرموني بالاساس فيه عوامل بيولوجية كتير واستيعاب ده هيساعدك تفهم نفسك وجسمك احسن وتعالجه احسن وكمان تبطل تكون قاسي على نفسك وتستوعب ان جزء من الموضوع مش قلة ارادة منك ولا انت اللي مفجوع ولا طفس، لأ فيه اليات في جسمك تسببت بعد ما انت عكيت شوية في الاول انها تكبر كرة التلج دي.

لو عايز تعرف بقية القصة وليه الدايت المبني على تقليل السعرات من غير ما نقلل الكاربز بيفشل بص هنا عالجزء التاني

وجود لاك لاي حد زي حالاتي بيحاول يفقد وزن ويحسن صحته