دليلك لفهم علم الاحصاءات في كرة القدم: مقدمة عن الداتا (الجزء الأول)

استخدام الارقام والاحصائيات لفهم وتطوير اداء اللاعبين في الالعاب الرياضية مش حاجة جديدة خالص، في كرة القدم يمكن ارسنال كان من الرواد من ايام هربرت تشابمان وبعد كده استثمار ارسين فينجر في الفكرة، والموضوع موجود في رياضات كتير يعني مثلا في كرة القدم الامريكية يمكن الموضوع كمان متقدم عن كرة القدم. ولو شفتوا فيلم Moneyball هتبقوا عارفين شوية اكتر عن الموضوع ودلوقتي دخلنا كمان في الxG.

ودلوقتي علم احصائات الكورة بقى شئ في غاية الاهمية وتقريبا مفيش فريق في الدوري الانجليزي الممتاز والدوريات اكبيرة معندوش محللين اداء وادارة كاملة للداتا والاحصاءات.

ليه الداتا مهمة وايه مواضع استخدامها في كرة القدم؟

الاهداف الرئيسية من استخدام الداتا والاحصاءات في كرة القادم للآتي:

• تحليل الأداء

وهنا بنستخدم ما يسمى علميا Descriptive analytics، او الارقام والاحصاءات اللي من شأنها “توصف” اللي بيحصل في الملعب. ودي بيتم استخدامها لتحليل اداء اللاعبين في المباريات، والفرق على بعضها.

وكمان بيتم استخدامها دلوقتي في تحليل اداء اللعيبة اللي اندية بتفكر تشتريها عشان تساعد في اتخاذ قرارات الانتقالات.

• تطوير اللاعبين

الداتا كمان بيتم استخدامها في تحليل تطور الناشئين وفهمه، وفهم نقاط القوة والضعف ودا بيسمح باكتشاف مواهبهم ومراكزهم الافضل بدري واكتشاف النجوم الصغيرة في السن

• تقليل الاصابات

من ضمن الاستخدامات المهمة دلوقتي للداتا كمان هي تحليل الاحمال التدريبية والقدرات البدنية عند اللعيبة وبالتالي التنبؤ باحتمالات الاصابة ومعرفة امتى يزودوا ويقللوا الاحمال ويريحوا اللعيبة عشان يقللوا الاصابات. 

• المراهنات والعاب الفانتازي

ورغم اني حاططها اخر واحدة هي الحقيقة اهم واحدة لانها كانت من الدوافع الرئيسية لتطوير علم التحليل في الكورة وهي بيزنس المراهنات العملاق في الرياضة اللي بيقدربمليارات، وكان دافع اساسي لتطوير الداتا والاحصاء كمحاولة من المراهنين تقليل الريسك في المراهنات اللي بياخدوها واغلب منصات المراهنات بتفتخر بالانظمة اللي عندها وبتتسابق في اقناع اليوزرز بقوة نظمها الاحصائية

والعاب الفانتازي اللي هي في النهاية لعبة مراهنات بدون فلوس بشكل ما بتستفيد برضه من الداتا دي ولكن بالاضافة للDescriptive analysis اللي اتكلمنا عنه، بتستخدم نوع تاني مهم من الداتا وهو الPredictive analysis او الاحصاء التنبؤي، بيتسمى كمان الForecasting وهو محاولة استخدام الداتا والمعلومات اللي بتوصف اللعبة Descriptive واستخدامها لمحاولة التنبؤ باللي هيحصل مستقبلا بقى زي توقع مين هيجيب اجوال ومين هيكسب ومين هيخسر

والجزء ده اتطور دلوقتي وبقى يستخدم نماذج رياضية واحصائية Models وبعضها معتمد كمان على الذكاء الاصطناعي AI، والMachine learning في محاولة توقع حاجات زي احتمالات الفوز والخسارة واحتمالات الasissts وتسجيل الاهداف والclean sheets وغيرها.

انواع الاحصائيات

الانواع كتيرة جدا بس هتكلم عن شوية من المهمين والمشهورين

• Shot based stats

الاحصاءات المعتمدة على التصويب، اللي بتقيس حاجات في الكورة بناء على التسديدات اللي بتحصل ودي اشهر انواع الاحصاءات واوسعها انتشارا زي بقى الxG والxA، والShots on Target و conversion rate وxGC وغيرها

• Movement based

ودي الاحصاءات المعتمدة على الحركة وبتتم عن طريق تقسيم الملعب لمجموعة من الzones ومراقبة الحركة بينها ودي مفيدة جدا في التحليل الدفاعي فتبلاقي فيها احصاءات زي الPressures والProgressive runs و ال Ball carrying و Touches in final third وغيرها

• Passes based

ودي المعتمدة على التمريرات واماكن تلقيها في الملعب زي passes made و received و touches وغيرها

وخلينا نقول ان اغلب الداتا المتاحة هي action based أو معتمدة على تحليل افعال معينة من اللعيبة، لان فيه نوع تاني بس لسه مش متطور اوي ولا متاح اوي معتمد على تحليل الactions اللي متتاخدتش او المحتملة وكمان التحركات بغض النظر عن الافعال. بس مش موضوعنا هنا انا بقوله بس عشان اكمل لكم الصورة.

ليه الداتا اهم من الeye test أو اهم من التحليل عن طريق الفرجة بالعين المجردة

ودا سؤال دايما موجود عند العاب الفانتازي وعند مشجعي الكورة بشكل عام عن ان ايه لازمة الارقام مانا شايف بعيني فلان بيلعب حلو او وحش وخاصة لما الارقام نوعا ما بتبقى متناقضة من وجهة نظر المتفرج مع اللي هو شايفه بعينه.

لان ببساطه عيننا مبتقدرش تشوف كل حاجة، لاسباب انك مش شايف في النهاية كل حركة وكل لعيب في الملعب بالاضافة كمان لحاجة تانية هي اننا كبشر عندنا حاجة اسمها cognitive biases او انحيازات ادراكية وهي اننا عندنا انحيازات متعددة متعلقة بحبنا وكرهنا للعيب معين او فريق او طريقة لعب، او تقديرنا الغير دقيق لخطورة او عدم خطورة تحركات وفرص معينة

لكن الارقام اداة موضوعية، ملهاش انحيازات وملهاش مشاعر وبالتالي بترسم صورة ادق للي بيحصل فعلا.

الداتا كوسيلة لفهم كرة القدم وازاي نستخدمها كأفراد ومشاهدين

الداتا والاحصاءات عاملة زي كده البهارات ومكونات الطبيخ، هي في حد ذاتها ملهاش قيمة معينة، لكن قيمتها بتظهر لما بتحطها بالمقدار الصح في سياق سليم يسمح لك تطلع بطبخة حلوة

لو استخدمت نفس المقادير بطريقة غلط وطلعت اكلة وحشة هل العيب في المقادير ولا في الطباخ؟

دي اكبر مشكلة بشوفها دايما في مستخدمي احصاءات الكورة. استخدامها بدون فهم حقيقي لمعنى كل Metric أو رقم واستخدامها بدون سياق محدد يسمح لك ترسم صورة واضحة عن اللي بيحصل. استخدام الارقام عشان تطلع منها معلومة وتفهمها هو فن وعلم في حد ذاته

مثال: استخدام التمريرات مثلا كويسلة للحكم على لاعب وسط وجودته.

مجرد ان اقول فلان عمل عدد تمريرات سليمة شئ لا معنى له على الاطلاق، ومش بيرسم صورة واضحة لمستوى اللاعب ولا لاداءه، اتجاه التمريرات وجودتها والاماكن اللي اتعملت منها التمريرات ومدى خطورتها كلها مهمة اكتر بكتير عشان ترسم صورة واضحة لكن اني اقول مثلا لعيب عمل عدد تمريرات اكتر من لعيب شئ مبيدينيش اي معلومة مفيدة عن الملعب

كذلك احصائة مشهورة زي المسافة المقطوعة Distance covered، برضه احصائية عديمة المعنى وكون فريق او لعيب معين قطع مسافة كبيرة او صغيرة لا معنى له على الاطلاق برضه. لان فيه سياق مهم هنا هو مثلا اسلوب اللعب، ما لو فرقة بتلعب ضغط عالي مثلا طبيعي جدا تلاقي المسافة المقطوعة اعلى من الخصم، دا مش مؤشر على الجودة اد ما حاجة طبيعية نتيجة اسلوب اللعب مش اكتر.

بعض المصادر المجانية للاحصائيات

طب لو حبينا نتفرج على بعض الاحصاءات في الكرة بنفسنا؟ دي شوية مصادر مجانية جيدة جدا :

• Fbref.com: تقريبا احسن موقع مجاني ممكن تلاقي عليه داتا كورة، وده الداتا بتاعته مدعومة بواحد من اقوى شركات الاحصاءات في العالم statsbomb
• Understat: موقع احصاءات مشهور برضه وعليه داتا كتير مجانية، بس خلي بالك انهم بيستخدموا نموذج احصائي مختلف شوية فالارقام بينه وبين fbref ممكن تكون مختلفة شوية , وهو بشكل عام مركز على الاحصاءات المشتقة من الxG بالذات كmetric احصائي
• Whoscored, squaka: مصادر مشهورة للاحصاءات برضه
• Fivethirtyeight: تقريبا احسن موقع وبيعتبر المرجع في تقييم رانكينج لقوة الفرق وكمان بيستخدم في التنبؤ بالمراكز النهائية للفرق في الدوريات وفي البطولات الكبرى
• Drafthound.com: وده عليه واحد من اهم وسائل التوقع في السوق وهي الbookmakers odds وهي توقعات متعلقة بالفوز والخسارة وغيرها بناء على حركة المراهنات في السوق 

الجزء التاني صدر: هتكلم عن اشهر metric في الاحصاءات الكروية على الاطلاق: الxG