عادات العباقرة وطباع الفنانين

من الحاجات المهووس بيها من زمان فكرة اني اعرف الناس الكرييتف اوي بتعيش ازاي، بمعنى ايه الشكل التقليدي لحياتهم اليومية، الMorning routines، جو الشغل بتاعهم بيصحوا بدري ولا متأخر؟ بيحبوا يشتغلوا بالليل ولا الصبح؟ تقاليد حياتهم بشكل عام وقريت مالا يعد ولا يحصى من سير العظماء والمبدعين عشان اعرف اكتر

تعرف مثلا ان هاروكي موراكامي بيصحى 4 الفجر ويشتغل 4-5 ساعات، وبعدين ينزل يجري -للي ميعرفش موراكامي حتى الآن بيجري ماراثون- ويرجع يسمع مزيكا ويريح شوية وينام. وبيمشي على نفس الروتين ده بشكل دائم بدون تغيير على العكس مثلا الشاعر جيمس جويس اللي كان يومه مختلف، بيصحى متأخر ومعندوش وبيشتغل بالليل وبيشرب كميات مهولة من الخمور وبياكل كميات مهولة من الاكل بدون اي انتظام

مؤخرا لقيت كتاب جميل اسمه Daily Rituals: How Artists Work مجمع العادات اليومية لعدد كبير جدا من الفنانين والكتاب، وطبعا كتاب زي ده اكلته حرفيا في قعدة واحدة

المفاجأة بقى هي اكتشاف شئ مهم جدا: مفيش سيستم واحد نافع لكل الناس!

كل الكلام الفارغ اللي اتعلمناه طول حياتنا عن اهمية الصحيان بدري مثلا، كيركجارد الفيلسوف الكبير مكنش بيصحى بدري، رينيه ديكارت يومه كان بيبدأ 2 الضهر، الفنان الشهير هنري ماتيس كان بينام الصبح ويصحى بالليل اصلا، مفيش قانون موحد يقول ان الصحيان بدري حلو

وهكذا كل الهري اللي في كتب البروداكتيفيتي والتنمية الذاتية والتيدكس توكس عن ايه شكل اليوم المثالي اللي هيخليك منتج

بس على الرغم من التباين الشديد جدا بين عادات العباقرة دي، قدرت الاقي شوية تشابهات وقواعد عامة كلهم كانوا بشكل او بآخر بيعملوها وتقدر تقول انها من اسرار قدرتهم الابداعية وانتاجهم الغزير:

1- الروتين: أغلب العباقرة دول مهما كان شكل يومهم ولكن في النهاية كان عندهم روتين ثابت لنظام اليوم، سواء كان الصحيان بدري او متأخر، الشغل في نص اليوم او في اوله او آخره، كانوا بيكرروه هو هو كل يوم

2-الشغل لساعات طويلة متصلة: معظمهم كان عنده ساعات محددة للشغل على مشاريعه سواء الكتابة او الرسم، وsession الشغل عمرها ما بتقل عن 3 ساعات متصلة بدون اي distractions، وكلهم اشتغلوا لساعات طويلة في اليوم من 6 لحد 12-15 ساعة حتى سواء ورا بعض او متقسمين لحتت كلها طويلة وبيبعدوا فيها عن اي ازعاج او اتصال بالعالم الخارجي

كارل ماركس مثلا لما هرب لانجلترا كان روتينه اليومي انه من 9 الصبح ل7 بالليل بيقعد في المتحف البريطاني ومكتبته يشتغل، وبعدين بالليل تاني يقعد ساعات طويلة من الشغل.

3- حياة اجتماعية: روتينهم اليومي دايما متضمن عنصر اجتماعي بشكل او بآخر، حتى اللي بيميلوا فيهم للعزلة كانوا يا اما متجوزين وبيخصصوا وقت للقعدة مع شريكتهم، او بيخصصوا وقت للخروج والسهر او مقابلة صديق او عدد من الاصدقاء، بشكل يومي.
سيمون دي بوفوار مثلا كانت بتخلص سيشن الشغل الاولى الساعة واحدة وتخرج مواعيدها تقابل أصدقائها وفي فترة ما بول سارتر لما كانوا سوا لحد الساعة 5، وبعدين ترجع تشتغل تاني. كل يوم

4- جربت اعمل لعبة لطيفة وهي اني اخدت الكتابة وعديته على tool كده بتعد الكلمات وبتجيب اكتر كلمات مكررة، تفتكروا اكتر كلمة مكررة في الكتاب كله بين اغلب الناس دي كانت ايه؟

الخمرة؟ الأكل؟ الكتابة؟ ….. لأ!ا

كتر كلمة متكررة كانت:

القهوة!

اغلبهم كان بيحب وبيشرب القهوة يوميا، ومش بس كده، اغلبهم ليهم طقوس محددة في شرب القهوة بعضها عجيب. بيتهوفن مثلا كان دقيق جدا في تحضير كوباية القهوة بتاعته، لازم يتم طحن بالعدد 60 حباية قهوة كل يوم الصبح ويتعمل منها فنجان بطريقة معينة. وكان بيعد حبوب القهوة بنفسه قبل الطحن.كيركجارد كان عنده 50 طقم فناجين واطباق، وكل يوم سكرتيرته مطلوب منها تختار طقم حسب موود اليوم، وتبرر لكيركجارد اختيارها!

5-المشي: أغلبهم كان عنده شكل من اشكال الحركة الوحيدة اللي بيساعده ينظم افكاره، بس النمط الاكثر تكرارا لده كان المشي. يا اما مشي مقصود يعني بيطلع يتمشى لفترة معينة، او مشي غير متعمد انه بيمشي مشوار يومي معين. او درجة اعلى من ده زي الكاتب موراكامي اللي بيجري ماراثون كامل كل سنة وبينزل يجري كل يوم لدرجة ان ليه كتاب عن علاقته بالجري واد ايه مهم في حياته العملية

6-روتين متعلق بالاتصال بالجسد: دا يمكن غريب شوية ولكن متكرر بشكل واضح، اغلبهم كان عنده روتين ما متعلق بعلاقة الشخص بجسمه، بيكاسو مثلا كان بيرسم عاري تماما او بملابسه الداخلية، وودي آلن لما قصة تعصلج معاه يخش ياخد شاور طويل جدا يفكر فيه في المشكلة وميخرجش غير لما تتحل، هنري لوتريك كان بيقول انه لو ممارسش الجنس 4-5 مرات في الاسبوع مبيعرفش يشتغل، وغيرهم كتير عندهم علاقات ما متصلة باجسادهم بيمارسوها بشكل منتظم سواء ممارسة الرياضة او الدش او اليوجا او العراء او النوم على النجيلة

7-طقس استغراقي: زي الاتصال بالجسد اغلبهم كان عنده روتين ما فيه نوع من الrituals او الاستغراق في تفاصيل معينة، زي ما حكيت لكم عملية صناعة القهوة عند بتهوفن مثلا او هنري ميلر اللي كان لازم يفطر بالعدد بيضتين و 5 حتت من البيكون بيقف يعملهم بنفسه، توماس مان كان عنده وقت محدد في اليوم بيخش غرفة المكتبة ويقفل الباب ويمنع اي دوشة ويشغل الفونوغراف على مزيكا كلاسيكية ويدخن سيجار واحد، وغيرهم من العادات اللي بيمارسوها بشكل شعائري يومي كأنها صلاة

يعني من الآخر كده، نام كويس، حدد فترة لساعات شغلك من غير الهاءات ولا ازعاج خارجي، اشرب قهوتك الصبح ومارس روتين يومي ثابت، استغرق في طقس يومي يخليك تركز، ومتنساش حياتك الاجتماعية. اجري، او امشي بانتظام واتصل بجسمك واهتم بيه ومش مهم ايه روتينك بس التزم بيه وحب اللي بتعمله، ومتخفش من الاختلاف مفيش قاعدة مناسبة لكل الناس.

يمكن ده يخليك يوما ما واحد من القصص في مقال تاني زي ده. وهسيبكم مع انفوجراف لطيف جامع حبة من العادات اليومية لبعض المذكورين في الكتاب

---