دليلك لفهم علم الاحصاءات في كرة القدم: ما هي الاهداف المتوقعة xG (الجزء التاني)

في العصور الحديثة للكورة بدأ الاهتمام بالاحصائيات واستخدامها في تحسين القرارات خاصة على مستوى البحث وتقييم وتطوير اللعيبة يزيد، واتكلمت عن ده بتفاصيل اكتر في الجزء الاول من السلسلة اللي انصحكم تقروه الاول.

المرة دي هتكلم عن اهم Metric او وحدة قياس او احصائية ظهرت في السنين الاخيرة وبقى بيتم استخدامها بشكل واسع النطاق وهي الxG.

ايه هو الxG؟

هي اختصار لكلمة Expected goals. وشخصيا شايف انه مصطلح مسبب سوء فهم كتير للاحصاء ده. وشايف انه الادق وصفا ليه هو Chance quality لانه في النهاية مقياس لجودة الفرص اللي بيحصل عليها اللعيبة. وبدأ انتشار المصطلح بعد ما  سام جرين الاناليست في شركة اوبتا اتكلم عنه في مقال شهير في 2012 تقدر تقراه هنا.

خلينا نشرح بابسط الطرق ايه الxG او معناه ايه.

بشكل بدائي كده لما انت بتتفرج على ماتش مثلا وتشوف فريقك عمال يضيع فرص من وجهة نظرك كان مفروض تبقى اجوان وتطلع تقول لصحابك مثلا بعد الماتش: “دا كان مفروض نجيب بتاع 4 اجوال مش جول واحد بس؟” دا بشكل بدائي توصيف لفكرة الxG، انك بنظرك كده قيمت الفرص اللي حصلت في الماتش وشفت انها كانت تساوي 4 اهداف. الxG هو طريقة احصائية اتوجدت عشان توصل بدقة بقى لهو كان فعلا كواليتي الفرص دي تستاهل ايه

فابسط تعريف للxG هو انه رقم بيعكس احتمالية تحويل الشوطة دي لهدف فلو قلنا ان تسديدة كان الxG بتاعها مثلا 0.6، دا معناه انه في المتوسط الشوطة دي من المكان ده بالظروف دي لو لاعب متوسط شاطها 10 مرات، 6 مرات منها هتخش جول.

طب وده بيتحسب ازاي؟ وايه العوامل اللي بتخش فيه؟

الxG هو ما يسمى shot-based metric، يعني معتمد على التسديدات، بيحسب احتمالية تحويل تسديدة معينة لهدف، وبالتالي عشان يبقى فيه xG لازم يبقى فيه تسديدة، لو لعيب استلم الكورة في مكان خطر ومشاطش مبنحسبش xG للفرصة دي، فدي معلومة مهمة لازم تبقوا عارفينها.

في البداية، المدربين انتبهوا لاهمية احصائيات التسديد، ووقتها كانت عدد التسديدات هو الmetric المهم، وبعد كده ظهر الshots on target او كام تسديدة عالمرمى وبقى ليه اهمية اكبر، لكن مع الوقت اكتشفنا انه مش كل التسديدات عالمرمى زي بعض، وبقينا محتاجين نقيم بقى كواليتي التسديدة دي، ومن هنا اتولد الxG

شركات الاحصاءات العالمية بقى جمعت مئات الاف من داتا التسديدات على مر سنين طويلة -كل شركة بقى عندها مصادرها وكل ما كان عندها داتا اكتر كل ما وصلت لرقم ادق- يعني شركة زي opta مثلا عندها داتا لاكثر من 300 الف تسديدة باماكن التسديد بظروفه وحللت ده ووصلت لفين اكتر اماكن خطر في التسديد.

وطلعت بالاحصائية دي اللي بنسميها xG وهي رقم ما بين صفر وواحد

صفر معناها ان التسديدة دي استحالة احصائيا تنتج جول

1 معناها ان التسديدة دي في كل المرات هتخش جول ودا مستحيل احصائيا وبالتالي مفيش حاجة اسمها تسديدة الxG بتاعها 1 (حتى تسديدة جوا ال6 ياردة والجول مش موجود اظن شفتوا بنفسكم ان حتى دي ضاعت قبل كده عادي مفيش 100%).

بشكل عام عادة لو التسديدة الxG بتاعها زاد عن 0.38 بتعتبر  Big Chance، بس برضه ده على حسب الشركة.

في البداية كان الxG وتقييمه معتمد بس على مكان التسديدة، لكن مع الوقت ومع ظهور شركات مختلفة ونماذج احصائية مختلفة بقوا ياخدوا في حساباتهم حاجات كتير حسب الشركة زي مثلا:

• اللي شاط شاط برجلة القوية ولا الضعيفة
• كام لعيب بين المسدد والمرمى
• شاط برجله ولا براسه (الراس ليها xG اقل)
• نوع التمريرة اللي جاتله قبل التسديد
• اماكن المدافعين والحارس
• نوع الهجمة، يعني هل اللاعب رقص وشاط، ولا دي ريباوند ولا مقطوعة من الخصم ولا تمريرة

وبيتم بقى مقارنة التسديدة دي بكل التسديدات اللي بنفس الظروف وعلى اساسها يحدد الxG. وطبعا العوامل دي بتختلف من شركة للتانية عشان كده بتلاقي اختلاف في الxG بين الشركات، وكل ما كانت شركة واخده عوامل اكتر في حساباتها كان الxG بتاعها اكثر دقة.

مثلا: statsbomb تعتبر من ادق الxG الموجود في السوق لانها بتاخد في اعتبارها اماكن المدافعين  والحارس وزوايا جسمهم وضغطهم على المسدد وقت التسديدة عكس Opta اللي بتعتمد بس على مكان التسديد فعشان كده ممكن نفس التسديدة تاخد رقم اعلى في اوبتا من ستاتسبومب مثلا لانه احيانا اوبتا بتبالغ في تقدر جودة الفرصة. مش بس كده، statsbomb مؤخرا اضافت كمان ارتفاع الكورة للعوامل.

ازاي بقى نستخدم الxG

بعد ما فهمنا كويس الxG معناه ايه محتاجين نفهم ان الxG دا في النهاية اداة ممكن تساعدنا اكتر في فهم اللي بيحصل في الملعب لكن الرقم في حد ذاته بدون استخدامه في سياق سليم لا يعني اي شئ. ودي غلطة بيقع فيها ناس كتير استخدام ارقام الxG بطريقة غلط ويطلعوا بتفسيرات غير حقيقية باستخدامه وبتتناسى انه في النهاية برضه نموذج احصائي ليه الحدود بتاعتها ومشاكله -هنتكلم عنها كمان شوية- لكن تعالوا دلوقتي نتكلم عن بعض سيناريوهات استخدام الxG بشكل صحيح وازاي ده ممكن يفهمها حاجات عن الكورة ويساعدنا نشيل عوامل زي الحظ ونبص للكورة بشكل objective اكتر ونقدر نقيمها.

تقييم خطورة تسديدات فريق عن التاني بعد الماتش ميخلص

مثلا

فريق أ سدد 5 تسديدات عالمرمى – فريق ب سدد 10 تسديدات عالمرمى

عالورق، هتقول دا فريق ب كان اخطر وشاط اكتر عالجول

لكن لو دخلت الxG هنا مثلا وعرفت ان فريق أ راكم 1.3xG في حين فريق ب عمل 0.4xG 

نبدأ نفهم من السياق ان رغم ان ب سدد اكتر لكن واضح انها كانت تسديدات قليلة الخطورة اغلبها مثلا من بره المنطقة بسبب قوة دفاع أ، في حين انه على العكس رغم ان أ سدد اقل لكن كلها من اماكن اكثر خطورة وكان طبيعي يسجل منها جول على الاقل. وتقدر كمان تفهم الماتش اكتر لو بصيت على خريطة تسديدات الفريقين

فايا كانت نتيجة الماتش، نقدر هنا نقول ان فريق أ كان احق بالفوز، وحتى لو كان خسر الماتش ده فانت عارف انهم لعبوا كويس وبالتالي فرصهم افضل يكسبوا بعد كده في حين ان ب لو كان هو اللي كسب فهو كان محظوظ مثلا -هنتكلم عن ده- ومحتاج يتطور اكتر من كده عشان يعرف يكسب تاني المرة الجاية لان احتمال ضعيف ان لو الماتش اتكرر بنفس ظروفه انه يكسب تاني.

تعالوا ناخد مثال مشهور اكتر:

في الشامبيون ليج لما برشلونة فاز على ليفربول 3-0 في الذهاب

لو بصيت على ده بس هتقول الموضوع سهل وانتصار حاسم لبرشلونة ومش محتاج تقلق من العودة صح؟

الحقيقة ان الxG كان كالتالي:

برشلونة 2.15- ليفربول 1.58

فرق 0.6 بس، برشلونة مكنش متفوق بهذه الدرجة لكن ليفربول هو اللي مكنش حاسم كفاية لكن صنع فرص خطيرة كتير.

طبعا كلنا فاكرين حصل ايه في العودة.

ازاي تقيم لعيب scouting

زمان كان اللعيبة الone season wonder كتير جدا. لعيب يبقى محظوظ في موسم ويسجل كتير والاندية تتخانق عليه ويطلع بلح في الآخر. دا طبعا هيفضل موجود في الكورة لكن مع استخدام الاحصاءات قل كتير عن زمان

تعالوا ناخد مثال:

لما تشيلسي قرر يشتري هيجواين، لو كانوا بصوا كويس على احصاءات الxG الخاصة بيه كانوا لاحظوا التالي:

لو بصيت على اخر 4 مواسم ليه قبل ما يروح تشيلسي، هتلاقوا اجواله بدأت تقل في موسم 2017، وده عادي ممكن يتم تفسيره بـoff season مش انخفاض عام في المستوى

لكن لو بصيت على الxG بتاعه هتلاقي ان الxG بتاعه بيقل بشكل سنوي، وده معناها انه بطل يشوط من اماكن خطرة وده دليل واضح على انخفاض مستمر في المستوى وبالتالي تسجيله ل5 اهداف بس مع تشيلسي مكنش مفاجأة لو كنت بصيت عالxG بتاعه كويس وكنت تقدر تتنبأ بده وتتفادى التعاقد معاه.

التنبؤ بادأ فرق في الدوري وتحويل الxG لxPts او النقاط المتوقعة

دلوقتي مش بس تقدر تحسب الxG، فيه كمان xGC او expected goals conceded او احتمالية الاهداف المستقبلة (اللي هي ببساطه xG الخصم يعني). وبالتالي تقدر تحسب فرق الxG او xGD اللي هو expected goal difference، وعلى اساسه فيه موديلز مختلفة بتتبنأ بازاي تحول الفارق ده لنقط متوقعة، مثلا موديل understat بيقول التالي:

وبالتالي تقدر تقدر تقريبا النقاط المتوقعة لفريق شكلها ايه وتقدر تعرف النادي محتاج يتطور في ايه.

مثلا: في 2016/2017 تشيلسي فاز بالدوري وبشكل يبدوا مرتاح لكن جدول الxG والxP كان بيقول كلام تاني:

كان فيه overperformance واضح في عدد الاهداف المسجلة لتشيلسي

عالجانب الآخر مانشستر سيتي دخل فيه اجوان بنسبة اكبر مما يجب مقارنة بالفرص اللي اتعرض ليها. ولو اعدت ترتيب الجدول طبقا للxPts هتلاقي ان الطبيعي كان يبقى سيتي في المركز الاول، وتشيلسي ما بين التاني والتالت.

يعني من هنا نقدر نستنتج ان تشيلسي محتاج يطور هجومه والا الاداء ده مش هيتكرر وسيتي محتاج يحل مشكلة دفاعه.

لو فاكرين، الموسم اللي بعده سيتي باع برافو واستقدم ايدرسون وانهى الدوري كما كان متوقع في المركز الاول.

تشيلسي؟ باع دييجو كوستا وجاب الفارو موراتا اللي كانت ارقامه اقل بكتير، النتيجة؟

زي ما xG توقع الموسم اللي قبله، اللي حصل كان overperformance مش تفوق حقيقي، ومتكررش ونزلوا اكتر الموسم اللي بعده. 

بونص: بص عاليونايتد كده و توقع من المظر ده عملوا ايه الموسم اللي بعده؟

مشاكل الxG

الxG مهواش الاحصائية الوحيدة في كرة القدم يعني والعلم ده اتطور كتير، وزي اي نموذج رياضي واحصائي ليه حدوده وعيوبه وميقدرش يوصف كل حاجة في الكورة يعني، وبالتالي مهم نعرف عيوب وحدود قدرات الxG عشان نعرف نتخدمه في السيناريوهات المفيدة بس.

1- الxG مبياخدش في اعتباره قدرات اللاعب

مثلا، لو تسديده من جوا المنطقة الxG بتاعها 0.4، سواء ميسي اللي شاطها او رمضان صبحي، هيفضل تقييم النموذج للتسديدة واحد.

احنا عارفين ان فرص ان ميسي يجيب الكورة دي اعلى لان عنده قدرة على الفينيش finishing ability اعلى ودي حاجة النموذج مبيعكسهاش

ولكن، ودي نقطة مهمة جدا جدا انك تفهمها عشان ناس كتير بتقع فيها. قدرة التهديف على المدى الطويل (لو بتبص للداتا يعني على مدار موسم مثلا) مش بالاهمية اللي انت متخيلها. فيه نقاشات كتير في عالم المهتمين بالاحصائيات الكروية عن الموضوع ده بس بشكل عام اغلبهم مش بيشوف انها تقدر تضيف لكواليتي التسديدة اكتر من 10-15% بالكتير اوي فهي مهمة طبعا وفيه محاولات كتير لصنع نماذج تقيس القدرة التهديفية لكن مش بالاهمية اللي انت متخيلها

على العكس، اللعيبة المميزة او الelite مميزاتها الرئيسية بتكون في قدرتهم انهم يسددوا عدد كبير من التسديدات من اماكن ليها xG عالي. وده مينفيش ان بشكل عام اللعيبة الelite بتميل انها تoverperform الxG بتاعها.

2- الxG مش بياخد في اعتباره حالة الماتش او الgame state

مش دايما الxG بيكون مقياس دقيق لاداء فرقتين في ماتش معين، لأن الxG مش بياخد في اعتباره التغييرات التكتيكية اللي بتحصل في الماتش وحالته.

بص للسيناريو ده مثلا: فريق من تسديدة الxG  بتاعها 0.3 احرز هدف، وقرر يرجع ورا ويقفل ويدافع. وبالتالي الخصم ماسك كوره وعمال يشوط تسديدات كلها ليها xG منخفض عشان التقفيل -فكر في بيرنلي مثلا اسياد الموضوع ده ايام sean dyche- وبالتالي اخر الماتش ممكن تبص تلاقي الفريق الخسران عنده xG أعلى وتفتكر انهم بس حظهم وحش. لكن الحقيقة ان ده كان اختيار تكتيكي من المدرب وان الفريق اختار يرجع ويدافع لو كان هاجم مكنش الارقام هتبقى كده.

فالxG مبيعرفش ياخد النقطة دي في اعتباره اوي وبالتالي بتحتاج تبص على ارقام تانية معاه زي الاستحواذ وعدد التسديدات واماكنها عشان تفهم حالة الماتش اكتر. خاصة لو بتبص على نموذج xG زي بتاع understat مثلا اللي مش بياخد في اعتباره مكان المدافعين.

فبرضه مهم تعرف النموذج اللي بتستخدمه للتقيم كxG بياخد في اعتباره ايه ومبياخدش ايه.

معنى انك تبقى Overperforming او underperfoming الxG 

دي برضه نقطة مهمة اوي بيساء فهمها كتير في كره القدم. الاول يعني ايه overperforming ؟

معناها انك تحرز اهداف اعلى من الاهداف المتوقعه. مثلا ان صلاح يراكم xG 6.7 لكن يجيب 12 جول فهنا نقول انه overperforming ب الفرق اللي هو +5.3

والunderperforming العكس طبعا.

طيب ده تفسيره ايه؟ ده سؤال صعب لان الظاهرة دي ليها معاني كتيرة وحسب بتبص لها على مدى زمني شكله ايه وتكرارها.

بشكل عام في علم الاحصاء في قاعدة بتقول انه دايما Trends always revert to their means، يعني ايه؟ يعني اي overperformance او underperformance في النهاية لازم هيرجع للمتوسط، مش هيستمر فوق او تحت الxG بتاعه للابد. على المدى هيرجع لقرب الرقم بتاعه.

ده معناه ايه؟ ان لو لعيب بيoverperform، انك تتوقع انه هيفضل يعمل كده علطول توقع خاطئ، في النهاية دايما هينزل للمتوسط في النهاية، الفكرة اننا منعرفش هينزل لها امتى بالظبط، عشان كده الاحصاءات والارقام بتكون ادق لما بتبص على مدى زمني طويل، على المدى القصير ممكن جدا الارقام تبقى اعلى او اقل. 

غير كده زي ما قلنا اللعيبة الelite بشكل عام بoverperform جزئيا بشكل منتظم، ولما نلاقي لعيب بيoverperform على المدى نقدر نحكم انه عنده قدرة تهديفية كبيرة، بس في النهاية برضه ده ليه حدود، مهما كنت لعيب هداف قدرته على overperforming your xG ليها ليميت مش كبير ولو عديته هتبقى فترة حظ هتنزل منها تاني.

مثال: برناردو سيلفا الموسم ده

لو انت من اللي بيلعبوا فانتازي فاكر الفترة اللي كل الناس سخنت فيها على برناردو سلفا وبدأوا يشتروه، سجل 6 اهداف في 8 ماتشات. لكن لو بصيت على الxG بتاعه هتكتشف انه سجل ال6 اهداف دول من 3.2 xG فقط. Overperformace عنيف جدا ومش sustainable ومستحيل يستمر. خاصة لو بصيت على تاريخ برناردو اللي بشكل عام اهدافه فيه قريبة من الxG بتاعه مش لعيب بشكل عام بيتخطى المتوقع اوي كده:

اللي قرروا يشتروه وتجاهلوا الxG حصل لهم ايه؟

هدف واحد من 10 ماتشات من 1.48xG زي ما توقع المودل بالظبط ان الرقم هينزل وان ده كان ستريك مؤقتة وهتنتهي.

طبعا نقدر نقول نفس الاستنتاجات عن الunderperfoming اللي معناها ممكن يكون باد لاك او ان اللعيب ده ضعيف تهديفيها وعادة مش هتقدر تحكم على ده غير على المدى الطويل شوية، لكن في كل الاحوال برضه مش هيكون بعيد اوي في النهاية عن الxG بتاعه.

مغالطة المقامر The gambler’s fallacy

فيه برضه خطأ تاني بيقع فيه بعض الناس وهو اعتبار انك عشان كان فيه overperformance الفترة اللي فاتت لازم الفريق-او اللاعب- يUnderperform عشان يرجع للمتوسط. وده مش حقيقي برضه. الطبيعي انه يرجع للمتوسط بتاعه لكن مش مطلوب احصائيا انه “يعوض” الoverperformance اللي حصل والعكس.

الاحصاءات المشتقة من الxG

بعد تطور نماذج مختلفة للxG بدأت تطلع بقى احصاءات مشتقة، زي مثلا الxG نفسه على مستوى لاعب او فريق، وزي xGC اللي هي تقدير الاجوال اللي تدخل في فريق بناء على فرص الخصم

وزي كمان الxA او الexpected assists ودي موضوع معقد مش هخش في تفاصيله لان ليه نماذج مختلفة حسب الشركة بس اشهرهم اوبتا مثلا بتحسب xA بناء على الxG بتاع التسديدة اللي اتشاطت، يعني بيقيم كواليتي الاسيست بناء على كواليتي الشوطة اللي اتشاطت من التمريرة، وبالتالي لو انا اديتك اسيست حلو ومشوطش اصلا مش هيحسب xA اساسا ودا عيب في الموديل ده وبقى فيه موديلز تانية بتحاول تحسب Non shot xA وقصة كبيرة كده ممكن نروح لها وقت تاني.

فيه PsxG وده اللي هو Post shot xG. ودي احصائية مهمة ظهرت في السنين الاخيرة خليني اشرحها:

نقدر نعتبر الxG دقة اكبر هو Pre-shot xG، او تقييم لجودة التسديدة مع الاخذ في الاعتبار كل التسديدات اللي اتشاطت بنفس الظروف بغض النظر عن التسديدة بتاعتك نفسها، يعني انا بحسب كل ده من قبل ما انت تشوط وبالتالي مش باخد في الاعتبار مثلا انك بعد ما شوطت الشوطه دي طلعت بره المرمى اصلا او خبطت في حد او حصل لها دفلكشن.

الPSxG بقى بيحسب بس xG التسديدة اللي وصلت للمرمى او الshots on target xG فقط وبالتالي التسديدات اللي بتوصل الPSxG بتاعها هيكون اعلى شوية من الxG العادي لانها بافيريج اعلى عشان شال من الحسبة كل التسديدات اللي موصلتش المرمى اصلا. 

طب ده مفيد في ايه؟ دي بقت الاحصائية الذهبية في تقييم قدرات حراس المرمى، وكمية الاهداف اللي دخلت بالمقارنة بالPSxG تقدرمن خلالها تفهم اكتر الحارس ده قدراته ايه، ودي هخليها لمقال تاني اشرح فيه ازاي رقميا بيقيموا حراس المرمى دلوقتي بس نقدر نقول مثلا السنة دي:

ان حارس ووفلز انقذ فريق من حوالي 9 اهداف كان مفروض تدخل فيه وهو شالها، وده تحليل مبسط الموضوع اعقد سنة بس يعني رقم زي الPSxG سمحلنا نعرف معلومة زي دي.

اقرأ ايضا: دليلك لفهم علم الاحصاءات في كرة القدم: حراسة المرمى (الجزء التالت)

طب ملخص سريع كده؟

1. الxG واحد من اهم الadvanced metrics اللي ظهرت في الكورة في السنين الاخيرة
2. عشان تستفيد من اداة الxG لازم تستخدم في سياقات صحيحة والا هتطلع باستنتاجات خاطئة
3. متستخدمش الxG مباشرة للحكم على نتيجة ماتش غير لما تعرف خريطة التسديدات وعددها عشان ده ممكن يظهر لك صورة مختلفة عن انطباعك الاولي
4. الافضل انك تبص على ارقام لاعب على مدى طويل زي سيزون او عدد مواسم مختلفة عشان تطلع بنتيجة ادق عن ادائه لكن على مستوى الماتش والماتشين ممكن الارقام تخدعك
5. فيه حاجة اسمها NPxG ودي اللي هي Non penalty xG بتشيل البلنتيات من الxG عشان تديك نتيجة ادق
6. البلنتي عكس ما انت متخيل الxG بتاعه مش 1 خالص، هو 0.76 يعني اي بلنتي احتمالية تسجيله هي 76% بدون الاخذ في الاعتبار مين المسدد ومين الحارس
7. الxG كرقم ممكن يختلف من مزود احصائيات للتاني حسب النموذج اللي بيستخدمه. كورة ستاتس غير اوبتا غير ستاتس بومب
8. الxG مش بيقيس كل حاجة في الكورة لانه في النهاية معتمد على التسديدة. الاناليتكس دلوقتي بيحاول يتطور ما وراء ده ويطلع باحصاءات تانية متعلقة باماكن التمركز او المواقف اللي كان مفترض التسديد فيها وما تمش التسديد
9. الxA مشتق من الxG بس الفوارق بين المودلز هنا كبيرة برضه.
10. كرة القدم في النهاية لعبة معقدة، مفيش نموذج احصائي ولا metric مهما كان قادر على تحليل كل ظروفها

فين تلاقي احصاءات xG

نماذج الxG كتيرة جدا، وفيه بعضها متاح بشكل مجاني للناس تشوفها وتستخدمها في التحليل اشهرهم:

Understat.com ودول عندهم احصائيات لدوريات كتيرة جدا وبيستخدموا نموذج قوي على المدى الطويل بس ضعيف شوية لو بتبص على مستوى ماتش واحد مثلا

Statsbomb (Fbref): يمكن يكون اقوى نموذج xG موجود حاليا وبياخد اكبر عدد من العوامل، وهم فاتحين موقع fbref عليه احصائيات كتيرة جدا ببلاش ويعتبر من وجهة نظري الافضل على الاطلاق

Korastats.com ودول في مصر وبينشروا احصاءات بشكل دوري عن الدوري المصري على صفحتهم على فيسبوك بس معرفش كتير عن النموذج بتاعهم متكون ازاي.