دليلك لفرش بيت لذيذ ورخيص – الجزء التالت

ودي سعرها بيبدأ من 1000 جنيه حسب بقى مقاس السرير اللي انت هتقرر تجيبه كبير ولا صغير وكده.

اشتريت بتاعتي من قباني للأثاث

ملحوظة: هتلاقي الاسعار في قباني اعلى من اللي قلته عشان الاسعار دي هي سعر السرير + الضهر، الضهر زي تمن السرير يعني لو طلبت السرير من غير ضهر زي اللي في الصورة هينزل سعره للنص.

بالنسبة للمرتبة؟

دي بقى طلعت قصة كبيرة، بس خليني اقول لكم ان من اللي وصلت له، دي اهم حاجات تشوفها في المرتبة:

1- تكون سوست منفصلة مش متصلة

2- يكون ارتفاعها في حدود 25 سم

3- متجيبش ميمور فوم وحش جدا للضهر

4- لو عايز تكلف، هات واحده سطحها لاتيكس

5- فيه نوع من المراتب بيبقى سفنج مضغوط بيبقى ناشف ويقال انه افضل للضهر بس مجربتش

6- الانواع النضيفة في مصر هم يانسن وهابيتات، وفيه تاكي ارخص شوية ونضيف برضه

الاسعار بقى بتبدأ من 2000 لحد 6 و 7 آلاف جنيه حسب بقى مقاس المرتبة وارتفاعها وسطحها قطن ولا فايبر ولا لاتيكس.

طب والدولاب؟

في الأول كنت ناوي اشتري دولاب بس لقيت اني بصراحه مش عاجبني اسعار الدواليب، ففكرت في حل تاني لطيف وجربته وكلفني كله على بعضه 790 جنيه بالظبط