دليلك لفهم علم الاحصاءات في كرة القدم: حراسة المرمى (الجزء التالت)

قبل ما نبدأ هسألك سؤال لو انت متابع الدوري الانجليزي وفكر في اجابته وحطها في دماغك كده وفي آخر المقال بص تاني وشوف

هل اجابتك هي هي ولا لأ

مين أحسن 3 حراس مرمى في الدوري الانجليزي الموسم اللي فات بالترتيب؟

---

حراسة المرمى من أصعب المراكز في كرة القدم. أغلب الوقت المنافسة فيها صعبة لأن الفريق فيه حارس واحد فقط، والفرق عادة مبتغيرش حراسها كتير فكمان الحركة والترانسفيرز في حراسة المرمى مش متنوعة ولا كبيرة. دا غير ان حراسة المرمى مركز تقني جدا، اغلبنا كمشاهدين ومتابعين ميعرفش بالظبط تفاصيله ومجربوش فحكمنا عليه بالمشاهدة اغلب الوقت مليان انحيازات واخطاء وبنتخدع بالانقاذات السينمائية وبتفوت علينا كتير نقاط مهمة في تقييم حراسة المرمى وكمان الارقام والاحصاءات المنتشرة زي عدد الاهداف والكلين شيتس كلها احصاءات خادعة في تقييم الحراسة لان ببساطه الهدف مسؤولية مشتركة بين الحراس والمدافعين. 

تقييم حارس مرمى لوحده حاجة صعبة وبقى ليها دلوقتي اسس وارقام واحصاءات مش معتادة هشرحها لكم في السطور الجاية.

تطور مركز الحراسة 

حراسة المرمى زمان كان بيتم تقييمها بناء على عوامل كلها بتندرج تحت بند واحد اسمه shot stopping، وهو قدرة الحارس ده على التعامل مع اشكال مختلفة من التسديدات سواء كانت بعيدة او قريبة او انفرادات وقدرته على منع التسديدة من انها تخش هدف.

كان ده كل عوامل التقييم. كرة القدم اتطورت كتير جدا من وقتها وبدأ يظهر جزء وعلم كامل تاني مهم وصعب جدا حسابه اسمه الgoal prevention وهي ازاي بقى حارس المرمى اصلا بيتحرك او بيتصرف بشكل يمنع اصلا فرص التسديد، مش بس ازاي هو بيصد، لأ هو ازاي كمان ممكن يقتل فرصة من بابها وبالتالي ميبقاش اصلا محتاج يصد، زي مثلا الcross claims او الخروج في العرضيات، او الsweeping او الخروج من مرمى عشان يقش كورة طويلة في ضهر دفاعه لو الدفاع متقدم مثلا او التمركز بشكل يمنع اساسا المهاجم انه يلاقي زاوية للتسديد ودي بقت مهارة كبيرة عينينا مش بتلقطها احيان كتيرة في تقييم حارس المرمى.

بس كده؟ لأ مع التطور التكتيكي في كرة القدم ابتدى دور حارس المرمى في صناعة الهجمة وتوزيعها كمان يزيد، فبقى بينضاف كمان لمقومات التحليل الdistribution بتاع الحارس، قدرته على التمرير سواء الطويل او القصير او مساعدة فريقه للخروج من الضغط -مثال كبير على ده ايديرسون مثلا في السيتي اللي وقت بداية الهجمة بيبقى لاعب اضافي في خط دفاع السيتي عادي جدا- وبقى بعض المدربين مثلا زي جوارديولا ممكن يهتم بان الحارس بتاعه يبقى ممرر جيد اكتر ما مهتم انه يبقى shot stopper جيد مثلا.

بس فيه نقطة مهمة هنا، حارس المرمى جزء من فريق كامل، وبالتالي مميزاته التكتيكية المطلوبة بتختلف حسب تكتيك الفريق. لو فريق مثلا بيلعب deep backline خط دفاعه مبيتقدمش كتير اصلا فمثلا ممكن قدرة زي ال1vs1 متبقاش مهمة اوي للحارس بتاع الفريق ده. لو فرقة مش بتصنع من ورا وبتلعب كرات طولية ممكن المدرب ميهتمش ان الحارس يبقى ممرر جيد ويبقى فارق معاه اكتر مثلا انه يبقى shot stopper هايل.

مثال: جون اوبلاك حارس اتلتكو مدريد واحد من افضل حراس العالم ان لم يكن افضلهم في اوقات كتير كshot stopper، بس بما ان اغلب فرق الدوري الانجليزي دلوقتي بتلعب بشكل فيه ضغط عالي وفارق معاها قدرات الحارس في التمرير عمره ما كان مطلب رئيسي لفريق كبير هناك، على العكس ايدرسون اللي هو حارس قدراته في التصدي متوسطة احصائيا مهم جدا للسيتي وعمرهم ما هيفكروا في بديل ليه لانه ممرر ممتاز.

ملخص عوامل تقييم حراس المرمى

زي ما قلنا نقدر نلخصها في التالي:

1- ايقاف التسديدات shot stopping ودا مقسوم ل:

• القدرة على التصدي للتسديدات
• القدرة على التعامل مع الانفرادات

2- تفادي التسديدات shot prevention ودا مقسوم ل:

• التعامل مع العرضيات
• الsweeping أو القش ورا خط الدفاع
• طريقة التصدي للكورة (بتصد لبره مثلا فبتمنع فرص الريباوند ولا بتصد لجوا فبتدي فرصة للخصم يخلق فرصة جديدة؟)

3- التوزيع والتمرير distribution ودي بتتقسم لحاجتين:

• التمرير بشكل عام (ضربات المرمى)
• التمرير تحت ضغط (لما المدافع يرجعهالك في موقف الخصم ضاغط فيه)

طبقا للتقسيمة دي، فاكر السؤال اللي سألته في اول المقال عن مين افضل حارس مرمى في الدوري الانجليزي؟ هستعين هنا بموديل طوره John Harisson المتخصص في تحليل وتقييم حراس المرمى ومدير قسم الdata science في موقع goalkeeper.com الشهير والكاتب في the athletic واوريك ده:

1. 

هنا مش داخل في تفاصيل التفاصيل والخبير ده حول الارقام لExG او كام هدف كل حارس من دول نتيجة تصرفاته قدر انه يمنعها طبقا لكل نوع من اللي قلناه، النتيجة؟

اليسون تسبب في حماية ليفربول من حوالي 19 هدف! وييجي بعديه حارس اغلب الناس مش بتقيمه بشكل كبير وهو هوجو لوريس حارس توتنهام وكابتن منتخب فرنسا

متفاجئ من الترتيب؟ ادركت ان عينينا مش بتقيم الحراس كويس؟

تعالوا ناخد رحلة سريعة في الجراف ده ونقول شوية ملاحظات طبقا للارقام دي:

• لو بصيت على الgeneral stopping او القدرة العامة للحارس على التصدي للتسديدات هتلاقي دي خيا حارس اليونايتد خارق مقارنة بالباقيين، انقذ الفريق كتسديدات من 10 اهداف بردود فعله العظيمة وقدراته الخارقة بين ال3 خشبات، ولكن في المقابل يعتبر اسوأ حارس مرمى في الستة الكبار في كل الحاجات التانية وبالتالي توتال اداءه نازل جدا، اتسبب بعدم خروجه في العرضيات مثلا في حوالي 5 اهداف، بيمرر بشكل سئ، واظن ده هيبقى نقطة استفهام كبيرة اوي عاليونايتد السنة الجاية في وجود تين هاج اللي بيحب يطلع بالكورة من ورا وبالتالي اللي بيعمله دي خيا مش هينفع. هل ممكن نتفاجئ بهندرسون اساسي؟ (مقال على ذا اثليتيك عن الموضوع لو مهتم)
• لو بصيت على منطقة الdistribtion، اديرسون الملك بلا منازع،  رغم انه اقل من الافيريج كحارس مرمى shot stopper، بس هنا النقطة اللي كنا بنتكلم فيها، بالنسبة لبيب فريق بيهاجم ومستحوذ اغلب الوقت مش فارق معاه انه الحارس يكون عظيم في التصديات قد ما هو عظيم في التمرير والتوزيع عشان كده ايديرسون حارس مثالي للسيتي لكن لو راح فريق تاني ممكن يبقى تعبان جدا، وعشان كده في تقديري ميصلحش اساسي منتخب البرازيل ابدا. فهو حارس average جدا لكن هايل في التوزيع. العيب ده بتشوفه واضح في الشامب بقى لما ميعرفش ينقذهم
• نتكلم بقى عن الافضل: اليسون. هتلاقي افضل 3 حاجات بيعملهم اليسون هي بامتياز التعامل مع الانفرادات ودي ميزة كبيرة لفريق بيلعب دفاع متقدم جدا زي ليفربول، ومتميز في الshot prevention في الخروج على العرضيات والدفاع في ضهر مدافعينه، ورغم انه اقل شوية من اديرسون في التوزيع لكن مش اقل كتير وعامة مش مطلوبة كتير منه. اليسون حارس مثالي لفريق زي ليفربول. (تحليل اعمق شوية لاداء اليسون)
• كمان نقدر نشوف اد ايه هوجو لوريس حارس اندر ريتد! رغم انه اقل من المتوسط في التوزيع، لكن قدراته في التصدي ومنع الهجمات ممتازة، لكن اللي بيخلي المشاهدين ساعات يقللوا منه انه متوسط في التعامل مع الانفرادات وهي لقطات واضحة اوي للمشاهد العادي. هوجو لوريس انقذ توتنهام من 7 اهداف السنة دي

هل فيه Metric ممكن يساعدنا نفهم اكتر كواليتي حراسة المرمى؟ 

اللي اتكلمنا عنه فوق برضه هي انواع من التحليل يمكن ملناش وصول ليها كافراد ومشاهدين ولازم محلل حراسة مرمى يستخدم نماذج معين مبنشوفهاش اوي عشان يطلع لنا ارقام زي دي ويقيم حارس، لكن لو انا كمشاهد عادي عايز metric يسمح لي افهم شوية اداء حراس مرمى زي ما بنبص للxG كده في تقييم المهاجمين، اعمل ايه؟

بص عالPSxG. اتكلمت عنه في المقال اللي فات وانا بحلل معنى الxG لو فاكرين.

1. 

خلي بالكم الPSxG بيقيس الxG بتاع التسديدة بعد ما وصلت للحارس، وبالتالي بمقارنة ده بالاهداف اللي دخلت تقدر تقول هو عن طريق التصديات انقذ فرقته من كام هدف. لكن لازم مننساش حاجة مهمة. زي ما قلنا تقييم الحارس بينقسم ل3 اقسام، الPSxG بيسمحلنا نشوف بس الshot stopping، التسديدات اللي اتشاطت بالفعل، الshot prevention مثلا مش هتشوفه هنا خالص لانه ما انتجش تسديدة وبالتالي مش هيتحسب.

وهنا هتلاقي دي خيا مثلا في اعلى الجدول عادي لأنه زي ما قلنا حارس مميز جدا في الshot stopping.

*بالمناسبة نفس الجدول ده بس انا مش قاطعه كله هتلاقوه هنا، وهتلاقيه بيبين كمان ارقام زي نسب التمريرات الناجحه ونسب الخروج للعرضيات تقدر تقيم منها بشكل جزئي جزئيات الprevention للحراس بس بشكل نسبي يعني مش مباشر زي PSxG.

 

طب هتلاقوني معلم هنا على 2 حراس وهم روبرت سانشيز وخوسيه سا، ليه؟

بص على الجدول ده اللي بيبين قدرات حراس المرمى في التصدي للانفرادات:

شايفين Sa و Sanchez ترتيبهم فين برضه؟ 

من الرسمتين دول تقدر تشوف قد ايه الاتنين حراس دول مستواهم اعلى من الفرق اللي فيها، الاتنين من اميز حراس الدوري الانجليزي في التصديات والتعامل مع الانفرادات، ودي صفات مهمة جدا في حارس مرمى في فرق بتلعب في الدوري الانجليزي بخط دفاع عالي. الحقيقة ان الارقام دي بتقول ان الاتنين دول ممكن بسهولة جدا يروحوا فرقة من التوب 4 ويأدوا ويستاهلوا ده. هل ده يحصل الموسم الجي؟ هنشوف!

بالمناسبة الارقام دي بتنصف كمان ميسليير حارس ليدز اللي ممكن اوي موسم ليدز السئ يكون اظهره بمظهر سئ للغاية وخلى الناس مش قادرة تشوف الكواليتي بتاعته. ودي ميزه الارقام، الارقام انصفت حارس ممتاز جدا رغم ان موسمه مكنش احسن حاجة لكن هو اتعرض لكم اختبارات مرعب وعمل اداء معقول مقارنة بظروف الفريق.

ملحوظة: احب اضيف معلومة تحليلية مفيدة هنا في الدوري الانجليزي بالذات، ان فيه تريند ظاهر بقاله كذا سنة من ان اغلب الفرق بقت تلعب بخط دفاع متقدم وضغط عالي، فنسبة المحاولات على المرمى اللي بتيجي من 1vs1 بتزيد دلوقتي كل سنة بشكل منتظم ووصلت ل32% الموسم اللي فات، وبالتالي دا معناه انه المهارة دي اصبحت في غاية الاهمية لحراس المرمى، لأن كل ما تميز فيها كل ما كان قدرته على فايدة فريقه اعلى، عشان كده اليسون هو الافضل وعشان كده من وجهة نظري روبرت سانشيز يستحق يروح نادي زي تشيلسي او يونايتد وديخيا يتقلش ويستفيده من انه ممكن يتباع برقم كبير.

لو مهتمين بتحليل اعمق لموضوع الانفرادات دا ثريد هايل على تويتر لjohn harisson بيشرح فيه التنكيكات المختلفة للتعامل مع الانفرادات بالشرح والامثلة:

https://twitter.com/Jhdharrison1/status/1273312389233082369

 

افتكر كده تاني ال3 حراس اللي فكرت فيهم في اول المقال، هل لسه رأيك انهم افضل 3 حراس بالترتيب؟ ولا فيه حاجة اتغيرت لما شفت الارقام؟