Nour Eldinمن بداية الكورونا والشغل من البيت ابتدى يبقى الطبيعي خلاص، وحتى لما الموجة قلت شوية ومتوقع حتى بعد ما تنتهي انه يفضل الشغل من البيت تريند مكمل معانا ولو بشكل جزئي.
لو انت زي حالاتي بتشتغل من بيتكم كتير، يبقى دا وقت مناسب تبدأ تستثمر في مكتب منزلي Home office مريح.
ومريح هنا بمعنى ergonomic. لان القعدة على المكتب فترات طويلة مع الوقت بتبهدل الضهر والرقبة والرجلين، ولو مخدتش بالك من دلوقتي وعملت قعدتك سليمة، قدام شوية هتزعل -ولو انت تلاتينات فانت بنسبة كبيرة بدأت تزعل خلاص.
تعالى نخش في الموضوع علطول:
قواعد المكتب الصحي المريح
أول حاجة محتاج تعملها هي انك تعرف حسب طولك وجسمك ايه القواعد اللي مفروض تتبعها اصلا عشان قعدتك تبقى صحية، تقدر من هنا تحط طولك وتشوف على الرسمة الارتفاعات السليمة المناسبة لجسمك وقعدتك عشان رقبتك وضهرك وايدك تبقى مرتاحة:
عرفنا القواعد؟ التنفيذ بقى:
الكرسي
أكتر جزء صعب، رأيي الشخصي ان الاستثمار في كرسي مكتب مريح شئ يستحقه ضهرك ورقبتك. فيه محل اسمه Scale في شارع الثورة عنده اسعار تعتبر معقولة جدا بالنسبة لكراسي المكتب المحترمة.
انا اخترت استثمر في ضهري وجبت كرسي اسمه Logic ب3500 جنيه:
طبعا مع حد طويل وحجمه كبير زي حالاتي الكراسي العادية صعب تناسبني لازم كرسي مكتب محترم.
لو انت عايز تجيب كرسي عادي او تستخدم كرسي عندك انت ادرى بجسمك، بس المهم تتأكد من الحاجات دي:
- ارتفاع الكرسي يكون مناسب زي الارقام اللي طلعتلك فوق
- رجلك تبقى مرتاحة عالارض، ولو محتاج ممكن تحط مخدة او مسند رجل عشان تريح رجلك اكتر
- ضهرك يبقى مفرود وانت قاعد، عكس ما انت متخيل 90 درجة في القعدة غلط، القعدة اللي متعملش حمل عالضهر هي بزاوية لورا شوية، 135 درجة تقريبا.
- لو عندك مشاكل في ضهرك يفضل كرسي فيه lumbar support
ايكيا عنده تشكيلة كراسي كبيرة ممكن تروح هناك وتجرب بنفسك تقعد على الكراسي، او اي محل بيبيع كراسي مكتب.
الطرابيزة
ارتفاع الطرابيزه ووسعها اهم حاجة محتاج تبص لها وانت بتشتري او بتستخدم طرابيزه للمكتب. الارتفاع لازم يبقى زي ما شفت فوق، والهدف الرئيسي انك وانت قاعد تبقى دراعاتك مرتاحة عالطرابيزه ومش عاملة حمل كبير على كوعك ولا كتفك ولا رسغك.
ايكيا عنده مكتب اسمه Linnmon/Adils القرصة 100*60 تمنه 745 (ارخص لو اخترت الابيض كمان):
بس انا اخترت طرابيزه بتتباع هناك كطرابيزه سفرة اسمها Tarendo عشان القرصة 110*70، وسعرها 995:
اهم حاجة غير الارتفاع تتأكد ان المساحة اللي تحت كافية لرجليك بشكل مريح وركبك مش خابطة في سقف الطرابيزه، عشان كده لا يفضل تجيب مكتب فيه درج من تحت او فيه وحدة ادراج في اليمين لانها بتضيق المساحة تحت المكتب. يستحسن تجيب وحدة ادراج لوحدها.
الشاشة
يفضل طبعا تجيب شاشة، بحيث اولا حجمها يبقى اكبر فتبقى مريحة لعينك اكتر (24 او 27 بوصة) ولو انت بتعمل حاجات كتير في نفس الوقت ممكن تعمل setup بشاشتين. اسعارهم مش عالية ممكن تشتريهم استيراد مستعملين من سوق العصر او تكنولوجي او البستان.
- الشاشة ال24 تعمل حوالي 950-1000
- لو هتشتريها جديدة السعر من 3-4 آلاف ال24 الكويسة
بالنسبة للقواعد السليمة للشاشة:
- لازم تبقى عالية بقدر يخليك وانت قاعد باصص لقدام خط الرؤية يبقى جايب التلت الاعلى من الشاشة
- المسافة بينك وبين الشاشة تبقى مسافة دراع (لما تفرد دراعك قصادك اطرافك تلمس الشاشة)
- ميل الشاشة 10-20 درجة لورا
- منتصف الشاشة يبقى تحت مستوى نظرك سنة
كيبورد وماوس
اشتري كيبورد وماوس وايرلس عشان تبقى دراعك ورزغك يبقوا مرتاحين، افتح سوق وهتلاقي Logitech عندهم كيبورد وماوس ب500 تقريبا طلعة واحدة.
اضافات:
ممكن تجيب الآتي كزيادة لو عاوز تظبط قعدتك اكتر:
- مسند دراعات
- مسند رجل
- مسند لرسغ الايد (highly recommended)
- زرعة لطيفة
- اضاءة كويسة على الطرابيزه اباجوره او حاجة
دي شوية لينكات لو عايز تعرف اكتر ازاي تقعد بشكل صحيح:
قعدة الكرسي الناشفة احسن لصحتك ولا الطرية؟
لو عندك كرسي الريدي، تظبطه ازاي عشان يبقى صحي اكتر
[…] اقرا اكتر: إزاي تعمل مكتب مريح في البيت بتكلفة معقولة […]