7 احصائيات كروية لا قيمة لها

اتكلمت في الاجزاء اللي فاتت عن انواع الداتا في الكورة، وعن ايه هو الxG وازاي نفهمه ونستخدمه، وازاي بيتم تقييم حراس المرمى بالداتا والتحليل.

النهارده هنتكلم عن 7 احصاءات كروية مشهورة جدا ومتداولة والناس بتستخدمها غلط تماما عشان تقيم ماتش او فريق او لعيب وهي احصاءات ملهاش اي تلاتة لازمة.

استخدام الاستحواذ في التدليل على ان فريق كان احسن في ماتش

أحد اكبر الأخطاء الشائعة. كون فريق معاه الكورة اكتر من فريق لا يعني اي شئ على الاطلاق. مش دليل على الجودة ولا على الكفاءة ولا على اي حاجة. احصائية الاستحواذ ممكن بس تكون مفيدة في فهم طريقة لعب فريق ما او تكتيكه. طبيعي فريق بيلعب كرة استحواذ او تيكي تاكا زي فرق جوارديولا مثلا تلاقيه دايما استحواذه على الكورة اكتر. على الجانب الآخر لو فريق طريقة لعبه على المرتدات مثلا، او على الهجوم الخاطف السريع طبيعي جدا يبقى استحواذه اقل حتى لو بيلعب افضل.

مثال: الموسم اللي ليستر فاز فيه بالدوري الانجليزي كان متوسط استحواذه في الماتش الواحد 42%، هل ده معناها انه كان فريق وحش؟

دا غير ان احيانا الموضوع بيكون ليه علاقة بالgame state، يعني مثلا ماتش ليفربول واتلتكو مدريد في الشامب لما اتلتكو سجل هدف في الدقيقة الرابعة من الماتش، قرروا يتراجعوا للدفاع وتقفيل الماتش والمحافظة على الهدف، ساعتها الماتش خلص باستحواذ 27% لاتلتكو فقط، هل ده معناها ان ليفربول كان افضل لمجرد انه كان ماسك الكور؟ لأ، هي نتيجة تغير حالة الماتش الارقام اتغيرت لكن ملهاش دعوة بحاجة

طب نستخدم ايه بدالها؟

 لو عايز تشوف مين كان افضل في ماتش من حيث صناعة الفرص التهديفية الxG مؤشر افضل بمراحل.

عدد التسديدات لقياس جودة المهاجم

زمان قبل اختراع الxG كان الناس بتبص لارقام زي عدد التسديدات او عدد التسديدات على المرمى او داخل الصندوق. كل ده دلوقتي مش مهم لانه بيتجاهل مكان التسديدة وقوتها وسرعتها وبالرجل ولا بالراس ومكان المهاجم وقصاده مدافعين ولا لأ الخ الخ.

نستخدم ايه بداله؟

الxG حل القصص دي، هو كرقم بيحمل في طياته كل الحاجات دي فانت بتعمل تكرار لما تبص لكل دا مع بعضه، بص للxG والxGOT والPSxG افيد بكتير 

عدد التمريرات الصحيحة لتقييم كفاءة لاعب الوسط او قدراته على التمرير

احد اكثر الاحصاءات اساءة في الاستخدام في عالم كرة القدم. عدد التمريرات الصحيحة او نسبتها بدون ما تحط في السياق اولا ستايل لعب الفريق، ثانيا نوعية التمريرات هل طويلة ولا قصيرة ولا محاولات لضرب خطوط الضغط، وهل لورا ولا للجنب ولا لقدام كلها بتدي مؤشرات خاطئة جدا.

لاعبي الوسط المهاجم مثلا بيحاولوا تمريرات خطيرة كتير على امل يصنعوا فرص، طبيعي تلاقي نسبة التمريرات الصحيحة بتاعتهم اقل من لاعب وسط دفاعي زي النني مثلا بيباصي دايما simple passes للجنب هتلاقي نسبة تمريراته دايما 95-97% دا لا يدل على اي كفاءة او مهارة

بدالها نستخدم ايه؟

 نتجاهل خالص عدد التمريرات ونبص على الProgressive passes مثلا او خريطة الحركة او اتجاهات التمرير عند اللعيبة المختلفة واماكن التمرير افيد بكتير انها تعرفك اهمية لعيب. وفيه كمان احصائية ظهرت مؤخرا اسمها xThreat بتقولك كل تمريرة بتزيد من نسبة خطورة الفريق قد ايه، ممكن تقرا عنها من هنا.

نسبة التصديات الصحيحة لقياس جودة حارس المرمى

زي ما اتكلمت في المقال السابق عن كيفية تقييم حراس المرمى، نسبة التصديات او عددها ملوش اي علاقة بتقييم قدرة الحارس، احصائية عبيطة ملهاش معنى ولا تضيف اي معلومة مفيدة. لانها ببساطه مبتاخدش في حسابها خالص لا جوده التسديدة ولا مسافتها، اكيد لو اتشاط على حارس مرمى 10 تسديدات من بره ال18 مقابل حارس تاني اتشاط عليه 10 تسديدات من جوا ال6 يارده مثلا هتلاقي الاول نسبة التصديات بتاعته اعلى لكن ده مش معناها انه حارس افضل اطلاقا، هو ببساطه اتعرض لاختبارات اسهل.

نستخدم ايه بدالها؟ 

زي ما قلنا، الPSxG والفرق بينه وبين الاهداف المستقبلة مؤشر افضل بكتير على قدرة الحارس على التصدي للكورة.

 نسبة التاكلينج الصحيح في تقييم كفاءة استخلاص اللاعب للكرة من الخصم

للاسف الاحصائية دي مليانة مشاكل، لانها بتتجاهل اي محاولة استخلاص بتنتهي بان الكورة تروح للاعب تاني، او تطلع اوت، او تتحسب فاول مثلا، وبالتالي الرقم اللي انت بتشوفه مش دقيق

بدالها ايه؟

 مفيش، فكك من الموضوع ده مش مفيد اصلا.

عدد التاكلز والكليرينج لقياس الكفاءه الدفاعية للاعب

من الاحصاءات اللي بتشوفها كتير مقارنة مدافعين ببعض من حيث عدد الtackles والclearences اللي عملها كل واحد كمقارنة لتحديد مين افضل. 

مثلا “ريكاردو بيريرا افضل مدافع في الدوري  ب120 completed tackle هذا الموسم”

القدرة الدفاعية بالذات مازالت من الحاجات الصعب قياسها في كرة القدم، عدد التاكليز اوالكليرينج اللي بيعملوا لاعب مش دليل على كفاءته، الارقام دي ممكن تكون مفيدة في فهم الستايل الدفاعي للفريق لكن مش كفاءته

على سبيل المثال لو بصيت على ارقام فيرجيل فان دايك، هتلاقيه عدد الtackles وال interceptions بتاعه مقارنة باغلب مدافعين الدوري قليل جدا. لانه ببساطه اسلوبه بيعتمد اكتر على غلق المساحات والاستخلاص بدون تاكلينج ولا ارتكاب اخطاء وزق المدافع لبره وليه مقولة شهيرة جدا انه when i have to tackle, i’ve already lost. هو بيلعب باسلوب انه ميبقاش محتاج اصلا يتزحلق على كورة وبيحب يفضل واقف على رجله. 

فالارقام دي ممكن تقولك معلومة عن استايل الدفاع، مش عن كفاءته ولا جودته.

نستخدم ايه بدالها؟

صعب برضه لانه البص على ارقام الدفاع مهم يكون في سياق اسلوب دفاع الفريق، بس انك تعدل الارقام وبدل ما تخليها مثلا عدد التاكلز في الماتش الواحد تخليها عدد التاكلز او الكليرنج adjusted for possession، يعني تقول اللعيب الفلاني عمل كام تاكل كل 1000 لمسة للخصم بحيث تبقى عدلت الارقام مقابل استحواذ الخصم. 

مثال، لو بصيت على هندرسون لاعب ليفربول هتلاقيه رقم 15 في عدد الtackles في الماتش ب2.6 في الماتش الواحد، لكن لو عدلتها وشفت هو بيعمل كام tackle مقابل كل 1000 لمسة للخصم هتلاقيه بيعمل 4.6، يعني الخامس عالدوري مش ال15.

المسافة المقطوعة لتقييم مجهود الفريق او اللعيبة

احصاءات زي فلان جري 15 كيلو  او الفريق ده قطع 30 كيلو. برضه احصائية في غياب سياق محدد مهياش دليل خالص لا على المجهود ولا على الجودة. 

مفيش اي علاقة طردية بين المجهود المبذول او المسافات المقطوعة والفوز مبدئيا، دا غير ان الارقام دي بالكتير قوي ليها علاقة بتكتيك الفريق واسلوبه.

يعني لو فريق بيلعب ضغط عالي مثلا طبيعي جدا تلاقي اللعيبة قطعت مسافات كبيرة في الملعب مقابل فريق تاني بيلعب مثلا low block. دا مش دليل على اي حاجة، مجرد اختلاف تكتيكي في الاداء.

على سبيل المثال عندك لعيب زي ليونيل ميسي هتلاقي ارقامه في الجري مش كبيره ابدا، مش لعيب بيعمل سبرينتات كتير ولا بيجري كتير في الملعب، هل ده ليه علاقة بجودته كلعيب؟ لأ اطلاقا، اسلوب لعبه مش بيحتاج ده مش اكتر او اسلوب لعب الفريق.

طيب نستخدم ايه بدالها؟

 مفيش الصراحه هي احصائية لا معنى لها ومش مهمة، تجاهلها وملهاش بديل معين